【全劇終】《我喺街執咗個失憶嘅女仔返屋企》: 美好的一天由誤會開始

到咗第二日。
 
因為今日要返學，所以尋晚我較咗鬧鐘。
 
一訓醒就見到小悠喺地下訓得好冧，講起嚟尋晚我太攰，都未等佢沖完涼就自己訓咗。
 
我小心翼翼咁繞過床舖，費事嘈醒佢。
 
一出房門，見到阿妹已經坐咗喺枱前面食早餐，對行過嘅我採取無視態度。
 




梳洗好後，我行埋餐枱嗰邊攞咗塊包，阿妹依然一句野都冇講。
 
「我遲啲再同你解釋，總之小悠…即係尋晚個女仔會住喺呢度先，不過我保證！佢一有地方住嘅話就會即刻搬！」
 
「關我咩事？阿爸阿媽問起嘅你咪自己同佢地解釋囉。」佢冷淡地回應。
 
呢個時候我間房道門打開咗，小悠一邊伸懶腰，一邊對我地講：「阿帆早晨，阿妹早晨！」
 
「早…」個晨字都未講到，我嘅視線就落咗喺小悠嘅衣著上面。
 




佢著住我尋晚俾佢嗰件墨綠色衛衣，因為呎碼問題導致件衫喺佢身上明顯過大，長到去佢大髀四分之一嘅位置。
 
本來咁樣冇咩問題——如果佢下身有著褲嘅話。
 
一定係我尋晚太攰，唔記得俾埋下半身佢著…
 
阿妹見到呢個情境，將手上嘅牛奶一飲而盡，然後「砰」一聲放低個玻璃杯。
 
之後粒聲唔出就入房嘭埋度門，出嚟嗰陣已經換好校服。
 




經過我身邊嘅時候，佢大大力踩咗我一腳。
 
「做咩踩我呀？」我痛到彎低身。
 
著好鞋之後，佢回頭講咗一句：「我唔該你唔好喺屋企搞埋啲咁核突嘅野。」 
 
「幾時有呀？」我大呻無辜，但阿妹已經頭也不回咁出咗門口。（都係嘭門）
 
佢一定係以為我同小悠尋晚喺房度……唉屌。
 
「我係咪又激嬲阿妹呀？」小悠一臉愕然咁問。
 
「唔係，今次真係我錯…」我嘅目光停留喺小悠身上，然後好自然地往佢雙腿望…
 
屌，我喺度做咩呀？我有珀奈架喇。




 
「我今日要返學呀，你自己一個ok嘛？」表面上我咁樣問，但我心裡面其實有個隱憂——
 
根據小悠所講，每當佢暈低之後，醒返嗰陣就會無啦啦喺我面前。
 
如果佢今日又發生呢個情況嘅話，唔單止我，應該全校都會俾佢嚇死。
 
理論上，只要佢無時無刻喺我身邊，「無啦啦出現喺我面前」呢一點就唔會成立，呢一個都係我帶佢返屋企嘅原因。
 
但關於佢呢個情況，實際上仲有太多未掌握嘅地方，咁嘅狀態之下留佢喺屋企其實好危險（畢竟我唔可能帶埋佢返學）。
 
「我自己一個可以呀，只係擔心會好似尋日咁樣…」原來佢都驚自己唔知幾時會暈低。
 
「呢一點我都有諗過，一陣我上上吓堂你突然閃出嚟就真係大檸樂。」
 




「對…」喺佢將道歉說話講完之前，我示意佢停止。
 
唯有對事物有充分嘅了解，先可以制定相應嘅對策——
 
「所以，我決定請假三日，為咗搞清楚喺你身上發生嘅呢個現象。」
 
至於所謂嘅請假其實即係曠課，我梗係冇同佢提起。