【全劇終】《我喺街執咗個失憶嘅女仔返屋企》: 閃靈現象

經過呢幾日嘅觀察，發生喺小悠身上嘅奇怪狀況（我稱之為「閃靈現象」）可以歸納出以下特點：
 
第一，呢幾日以嚟我已經見識到小悠嘅食量，所以更加肯定閃靈現象嘅發生同佢有冇食夠野係冇關係嘅。
 
第二，閃靈現象每日發生嘅次數並不規定。
 
第三，小悠嘅出現方式冇唔尋常嘅地方，意思係指佢唔會好似火影啲時空間忍術咁由身體某部分開始出現；而係次次我意識到嗰陣，佢已經喺附近。
 
第四，亦都係最重要嘅一點——我大膽猜測呢個現象只會喺我同佢相隔超過一定距離（大概係半徑1km左右，我鳩估）嘅時候發生。
 




「我諗極都諗唔明，點解你會好似吊靴鬼咁跟住我？我好肯定我係唔識你嘅。」我翹起雙手，合埋眼講。
 
「可能因為你個樣望落好人？」小悠諗咗一陣答。
 
我冷笑一聲：「咁我要令你失望喇，你千祈唔好覺得我係好人。」
 
「點解呀？」佢一臉天真咁講，「如果你係衰人嘅話嗰日你唔會買嘢食俾我啦，所以我覺得阿帆係個好人。」 估唔到呢個情況都有得收好人卡…
 
「呢個世界冇你諗得咁簡單，如果咁容易信人嘅話，蝕底嗰個只會係你自己。」
 




「總之我知道你唔會傷害我啦。」
 
我望住佢一雙清澈嘅瞳孔，口窒咗一窒：「…我喺度諗，會唔會係因為你喺垃圾房出嚟之後第一個遇到嘅人就係我，所以發生閃靈現象嗰陣先會出現喺我面前？」
 
「你又好似有道理…」
 
唔係好興呢啲劇情架咩，男主角喺街上執到來歷不明嘅女主角，因為女主角第一眼見到嘅就係男主角，所以自此就好似吊靴鬼咁跟住佢…
 
屌，根本係我而家嘅情況！
 




我嘅人生居然老套到要跟住輕小說模式去行！
 
而且大部分輕小說起碼一開始就會講明女主角係咩來頭：天使就天使，鬼就鬼，無家可歸嘅高中生就高中生…
 
但我除咗知道小悠個名，同埋佢咩都唔記得晒之外，對佢一無所知。
 
甚至連佢係乜野嚟，我都未搞清楚——佢嘅外表絕對同一般女仔冇分別（我最多當佢戴咗color con）；但每一次我好努力說服自己佢可能係人嘅時候，我又忽然醒起佢會閃靈，呢樣明顯唔係人類能力範圍內做到嘅事。所以，我都唔知。
 
「…我會盡力幫你搵返啲記憶。」
 
佢好開心咁笑：「嗱，我都話阿帆係好人架啦。」
 
望住佢嘅笑容，唔知點解我有啲怕醜，就嗱嗱聲扯開話題：「早啲訓喇，聽日仲要去學校搞入學手續。」
 
知道咗閃靈現象發生嘅條件（應該）之後，我好快就制訂咗完美嘅對策——




 
既然小悠唔可以同我分開太遠，我又冇可能帶佢返學嘅話…
 
就唯有俾佢成為我嘅同學。