【全劇終】《我喺街執咗個失憶嘅女仔返屋企》: 同住的第一晚

我帶咗小悠去我間房，一入到去，佢好似好興奮咁四周圍望。
 
「今晚你訓床啦，我訓地下。」我攞多張被舖喺地下。
 
「唔好！你俾我訓地下啦！」小悠突然好客氣咁講，「你已經幫咗我好多架喇。」
 
所以我都好客氣地回答：「唔好咁講，頭先我一時口快同阿妹講你係我女朋友，你會唔會介意？」
 
「唔會呀，你都係想幫我渣嘛。」佢對我笑一笑，「不過，你間房咩都冇嘅？」
 




除咗床之外，房入面就只有書枱、書櫃同埋衣櫃。
 
「尋晚啱啱執完房，掉晒啲垃圾啫。」
 
「哦，」呢個時候，佢目光停留喺我放喺書櫃入面嗰套爆漫：「你鍾意睇呢套漫畫？」
 
「唔係，跟風買嚟睇啫。」
 
「咁你平時鍾意做咩呀？」
 




「我？返學算唔算？」我諗一諗之後答。
 
「你鍾意返學…」佢細細聲念咗一次，又問：「返學好好玩架？」
 
「絕對唔好玩， 只不過，個人喜好啫。」
 
——因為返學代表我可以見到珀奈，呢個答案我當然冇講出口。
 
「我聽朝要早起身，你今晚早抖啦。」講完之後我準備換衫，就推咗小悠出房。
 




「阿帆，」小悠叫住我，然後問：「我可唔可以換件衫呀？」
 
「吓？」我打咗個突，醒起我地今日去完垃圾房，晏晝佢又坐過喺廁所地下…但霎時間叫我變套女仔衫出嚟…唔係冇嘅，如果阿妹肯嘅話。
 
「…你介唔介意著住我嗰啲先？」我揀咗個折衷方法，喺衣櫃求其摷咗件啱啱洗好嘅衞衣俾佢，「乾淨架，陣間我攞啲新嘅牙刷毛巾俾你啦，你而家去沖個涼先？廁所喺嗰邊。」我指一指出面。
 
佢冇介意不特止，仲好開心咁接過：「唔該阿帆！」 
 
由遇見呢個女仔，到而家接埋佢返屋企住，都只不過係二十四小時裡面發生嘅事，坦白講我有少少非現實嘅感覺，如果話呢一刻其實係發緊夢嘅話，我諗我會相信。
 
究竟你係邊個？
 
我打咗個喊露，未等小悠由浴室出嚟，就爬咗上床瞓教，冇幾耐就瞓著咗。