【全劇終】《我喺街執咗個失憶嘅女仔返屋企》: 返屋企

 
「陣間入到去，記住放輕腳步，唔好出聲。」我喺屋企門口示意小悠。
 
 
佢俾咗個OK手勢我。
 
 
頭先我同佢喺茶記坐到十一點半先返嚟（順帶一提佢喺呢段期間解決咗兩件蛋牛治、兩碗牛腩麵同埋兩杯凍檸茶），因為我睇準時間，十一點鐘阿妹就會訓教，唔會知道我帶咗小悠返屋企。
 
 




雖然瞞得一日瞞唔過第二日，但唯有見步行步。
 
 
慶幸嘅係我父母長期都喺外地工作，只會定時定後匯錢俾阿妹當係我地嘅生活費。（唔好問，我都想知點解唔係匯俾我而係俾阿妹）
 
 
話晒我先係親生嗰個…
 
 
阿妹係阿爸阿媽喺我六歲嗰年由孤兒院領養返嚟，雖然名義上叫佢阿妹，但實際上佢只不過細我兩個月，今年同我一樣讀中五。




 
 
分別在於佢讀緊嗰間係區入面嘅傳統女校。
 
 
由細到大，無論係讀書，運動定係任何方面，呢個阿妹總會拋離我一大截，尤其升咗中學之後，差距更加明顯。
 
 
記得以前我地感情好好，細細個佢俾隔離班肥仔蝦嘅時候，我會幫佢出頭，打到個肥仔一仆一碌；我俾老師罰留堂嗰陣，阿妹就會陪我一齊留堂。
 




 
但最近一兩年開始，我地之間嘅感情愈嚟愈淡，好多時我都聽得出佢對我嘅不滿，或者我呢個做人阿哥嘅太廢，廢到連個妹都睇我唔起。
 
 
我轉動手上嘅鎖匙，屋入面果然已經漆黑一片。
 
 
「快啲快啲！」我嗱嗱聲叫小悠入嚟。
 
 
忽然，個廳自己著咗燈，阿妹企咗喺房門口，望住我同小悠。
 
 
「…你仲未訓嘅？我咪講咗我去唱K唔使等我囉？」我口窒窒咁問。
 




 
「呢個邊個嚟架？」阿妹明顯講緊小悠。
 
 
「佢係…佢係…」我個腦高速運轉中，再喺千分之一秒間得出喺呢個情況下最合情合理嘅答案，「佢係我女朋友。」
 
 
我向小悠打眼色，佢好識趣咁同阿妹揮揮手：「你好呀！」
 
 
「嚟緊一排佢都會喺度住住先，因為佢冇屋企返。」我補充。
 
 
阿妹以鄙視嘅眼神望咗我地兩秒，然後細細聲講咗句：「…變態。」講完仲嘭我門。
 




 
「…佢好似唔鍾意我？」小悠企喺原地問。
 
 
「冇事，佢係唔鍾意我啫。」
 
 
「不如我都係搵過第二度住啦。」
 
 
「唔使，如果你好似頭先喺K房咁突然間彈出嚟，我估阿妹嚇死都似。」所以保險起見，都係留小悠喺我身邊安全啲。