【全劇終】《我喺街執咗個失憶嘅女仔返屋企》: 意外同居?

 
結果單都賣埋（盛惠845.6），我都係搵唔到機會同珀奈解釋。
 
「阿帆，你知唔知我係第一次嚟呢啲咁好玩嘅地方？」小悠仍然處於雀躍狀態。
 
我敷衍地搖頭。
 
「頭先都唔見你一齊唱嘅？」
 
我繼續搖頭，個腦只係諗緊點解同珀奈解釋。




 
小悠突然變到一臉沮喪：「…我係咪唔應該加入你地？」
 
我如夢初醒咁講：「唔關你事嘅，係我掉你喺街先，我應該同你道歉。」
 
佢靜咗幾秒然後問：「你鍾意頭先嗰個女仔？」
 
頭先唱K得珀奈一個女仔，所以小悠應該講緊珀奈。
 
「…你點知架？」




 
「因為你明明話有啲好緊要嘅野要做，但你又唔似鍾意唱歌吖，咁嗰件好緊要嘅事一定係指個女仔。」
 
「你分析力都幾好。」雖然浪費咗喺呢啲無謂嘅地方上面。
 
「不如我幫你同佢解釋吖？」
 
「唔使喇，我唔想個誤會愈嚟愈深…」呢個時候，我醒起另一樣更加重要嘅事，「係喎！點解我冇一早諗到…」
 
「嗯？」




 
「我原本諗住叫你求其搵個地方落腳先，話晒你都要有地方訓架？」
 
「嗯嗯。」
 
「但你而家咁嘅情況，成日突然間全身冇力又失驚無神彈出嚟…」
 
「嗯嗯。」佢一路聽住我講野。
 
「所以，我諗要搵個地方可以俾我隨時睇住你。」
 
「嗯嗯。」
 
「呢個地方要方便你之餘方便埋我，而且最好唔使錢。」雖然叫佢瞓住樓下麥當勞先都得，但對住一個女仔我又講唔出呢啲說話。
 




「嗯嗯。」
 
「你咪掛住嗯啦，幫手諗吓有邊度係符合晒我頭先講嘅條件？」
 
佢諗咗一陣之後答：「有呀！」
 
其實，我都諗到。
 
「…你諗緊嘅地方唔會係我諗緊嗰個地方掛？」
 
「你諗緊咩地方呀？」
 
的而且確，附近有個兩房一廳、座北向南、風涼水冷，最重要係唔洗錢嘅地方可以安置小悠，又可以俾我隨時睇住佢。
 
 




 
嗰度叫做我屋企。