【全劇終】《我喺街執咗個失憶嘅女仔返屋企》: 相遇篇：一隻失憶的鬼（下）

 
「我叫小悠，你呢？」
 
 
「我叫…咪住先，你知道自己個名？」我有啲大反應咁講。
 
 
佢點點頭：「但除咗呢樣野之外，我就咩都唔記得喇。」
 
 




小悠……我喺心入面唸咗一次，硬係覺得個名有啲熟，但又諗唔起喺邊度聽過。
 
 
「你呢？咁你咩名呀？」
 
 
「我叫高田帆，你叫我阿飯啦。」

 
「唔好。」





 
佢嘅反應令我出乎意料，我「吓？」咗一聲。


「阿飯唔好聽，我直接叫你阿帆好唔好呀？」

 
名呢家野，其實我都冇乜所謂，於是求其話：「是但你啦。」
 




 
「嗯！阿帆！以後多多指教！」佢把聲聽起嚟比頭先喺垃圾房見到佢嗰陣精神咗好多。
 
 
「不如你今晚搵個地方休息吓先，我出院之後再嚟搵你？」我諗佢都攰架喇。
 
 
點知佢搖搖頭：「唔使，我想坐喺度望住你訓。」
 
 
「吓？我訓教有咩好望？」
 
 
「我都唔知呀，反正我都唔攰。」佢雙手托住下巴同我講。
 




 
「唉，是但你啦。」我轉身背向佢，冇幾耐就訓著咗。

 
 
直到陽光灑落臉上嘅時候，我先知原來已經日頭。
 
 
唔怪得張床褥硬係同屋企嗰張有少少唔同，差啲唔記得自己尋晚入咗廠。
 
 
正當想訓多一陣，我突然意識到旁邊有人嘅氣息。
 
 
我馬上睜開雙眼，見到一個陌生女仔坐喺我床邊眼甘甘咁望住我。




 
 
「嘩！」我嚇到彈開一個身位。
 
 
「早晨呀，阿帆。」

 
我用咗兩秒時間清醒頭腦，原來尋晚嘅事真係唔係發夢，包括我遇到小悠，應承幫佢，同埋佢坐咗喺我床邊成晚呢件事。
 
 
「…你真係喺度坐咗成晚呀？」
 
 
「嗯嗯，」佢點點頭又問，「你肚唔肚餓呀？」




 
 
我摸一摸個肚，發覺裡面都幾空：「餓。」
 
 
「不如我地落街食野？」
 
 
「都好喎。」
 
 
於是我順便叫醫生俾我出院。
 
 
我同小悠出到街，發現好多學生喺度趕返學。




 
 
「係喎，差啲唔記得今日開學。」
 
 
「咁你今日使唔使返學呀？」小悠問我。
 
 
「正常係要嘅，但啱啱出院梗係借啲意請假，」我加快腳步費事俾熟人見到，「我地行快啲。」
 
 
我同佢求其入咗間茶記，搵咗個卡位坐低。

 
「靚女食咩呀？」伙記一嚟就問。

 
「阿帆你食咩呀？」小悠冇答伙記，反而問我。

 
「俾個早餐A，凍檸茶唔該。」

 
「我同佢一樣吖。」講完之後小悠好似想遞返個餐牌俾伙記。

 
伙記行開之後，我先醒起一樣好重要嘅野。

 
「喂！點解個伙記見到你嘅？」我儘量壓低把聲。

 
小悠好似嚇一嚇，然後答：「…我都唔知呀，可能抖咗一晚，恢復咗能量？」

 
我懶係聽得明咁點咗一下頭：「…哦。」


算啦，當中嘅邏輯，我已經唔想深究，畢竟同隻失憶嘅鬼食早餐呢回事本身就有違邏輯。

 
「兩份A餐，兩杯凍檸茶。」伙記極速上餐之後，我又醒起另一樣好重要嘅嘢——

 
「喂，原來鬼都會肚餓架？」我一路篤檸茶一路問。
 
 
「…鬼唔可以肚餓架咩？」反問完之後，佢望住枱面嘅兩份A餐，雙眼變得閃閃發光，之後向伙記揮一揮手，「唔該，我想叫多個早餐B呀。」
 
 
「收到。」
 
 
見到呢一幕，我已經唔知道用「鬼」去形容小悠究竟適唔適合。
 
 
既然普通人都見到佢，加上佢會因為肚餓而需要食嘢，講真，喺佢身上我搵唔到任何同「人」有分別嘅地方。
 
 
咁樣諗之後，我發現自己好似冇咁驚。