【全劇終】《我喺街執咗個失憶嘅女仔返屋企》: 第零個線索

食緊早餐嘅時候，我終於入正題。
 
「既然你唔知自己邊度嚟，即係你嘅記憶係由尋晚垃圾房開始？」
 
佢諗咗好耐：「……我記得我聽到好大聲行雷聲，之後一醒返就喺嗰個地方，然後就俾你啲垃圾掟中喇。」
 
我禮貌又不失尷尬地笑一笑：「唔通你俾雷劈中所以失憶？」
 
但又點解釋佢會無啦啦去咗垃圾房先？唔通同一我樣咁啱去掉垃圾？
 




我愈諗愈頭痛，反正得個諗字都唔會有進展，於是同佢講：「唔好理喇，我地一於去返尋晚個垃圾房，睇吓會唔會有咩線索。」
 
「嗯！」小悠好開心咁講。
 
「叫你去垃圾房你都咁開心，真係話你on9驚你嬲…」
 
食完早餐之後，我地就返咗去尋晚第一次見面嘅地方。
 
清潔姐姐推住垃圾桶喺入面行出嚟，順便睥咗我地兩眼。
 




「我地真係入去呀？」小悠咁樣問我。
 
「怕咩啫？尋晚你都喺呢度出嚟啦！」
 
「但尋晚，好似冇咁多垃圾。」
 
睇嚟我忽略咗一樣嘢，朝早呢段時間係姐姐收垃圾嘅高峰期，垃圾房陣味比尋晚濃烈得多。
 
不過都冇辦法。
 




「唔入去就唔會有第一步，行啦！」講完我快快手拉小悠入去。
 
我記得尋晚佢係由最埋面走出嚟，唔知好彩定唔好彩，嗰度嘅垃圾似乎仲未送走，連我尋晚掉嗰兩袋都仲喺度。
 
我一野乸起衫袖：「你企喺度，我去揾吓啲垃圾裡面有冇線索。」
 
隔夜垃圾乜都有，冷飯菜汁、爛生果、用過嘅condom…所有野混雜埋一齊嗰陣味難頂到冇返咁上下道行應該會嘔出嚟。
 
但應承咗小悠要幫佢，冇理由縮沙架？
 
於是我強忍住作嘔嘅感覺，一路摷一路諗：
 
咁樣做其實有咩意義？
 
我唔係認為會喺垃圾堆入面摷到佢張身分證吓嘩？




 
最後，我得出一個結論：冇，我而家做緊嘅嘢係on9仔先會做。不過有得扮吓偵探幾好玩啫。
 
同埋，我想幫佢。
 
直到將附近垃圾都摷過一次之後，我忽然有種實在感——係嗰種努力做完一件事之後嘅實在感。
 
雖然我咩都搵唔到。
 
「睇嚟我地嚟錯咗。」
 
「唔緊要啦，我地慢慢嚟。」佢少少失望都冇，反而望落有啲開心咁講，之後用衫袖幫我抹走臉上嘅污糟野：「你睇吓你搞到塊臉。」
 
我俾佢呢個動作嚇咗一跳，兩秒之後先記得講一句：「…唔該。」
 




呢個時候，電話傳嚟張廷宇嘅通知，佢係我喺學校嘅死黨。
 
內容係問我死得未，未死得嘅就一齊去唱k。
 
我望一望隻錶，原來已經十一點，我居然摷垃圾摷咗兩粒鐘。
 
平時我諗都唔諗就會拒絕佢，但今日有少少唔同，我嘅目光俾最後一行文字吸引住：
 
聽講Hana都會去。