【全劇終】《我喺街執咗個失憶嘅女仔返屋企》: 相遇篇：一隻失憶的鬼（中）

呢一晚好似過得特別長，我望住外面嘅樹景，冇幾耐就愈來愈眼訓…
 
 
「喂！」
 
 
半睡半醒嗰陣，聽到好似有人叫我。
 
 
「喂！」


 
 
「聽唔聽到呀？」我感覺到有人輕輕搖我膊頭。
 
 
呢把熟悉又陌生嘅聲音…
 
 
我喺心入面將十七年嚟所學嘅四字真言全部背晒出嚟，希望可以趕走聲音嘅主人。
 


 
點知趕唔走不特止，耳邊繼續傳嚟佢嘅聲線：「對唔住呀，明明你幫咗我，點知搞到你入院。」
 
 
我用被褸住自己繼續扮訓。
 
 
「我冇心傷害你架，我只係…唔知自己點解會喺垃圾房，到我一醒返就見到你。」
 
 


唔知乜野原因，聽住佢把聲令人有種心軟嘅感覺，我逐少睜開眼，開著手機電筒，坐喺我床邊嘅依然係嗰個一眼望落同普通人冇分別，只係擁有一雙紫瞳嘅女仔。
 
 
「…點解陳伯見你唔到？你係鬼？」連我自己都唔相信，我竟然會咁平靜咁問一隻鬼佢係咪鬼。

 
佢好似嘆咗啖氣，好細聲咁講，細聲到幾乎聽唔到：「我…我都唔知。」

 
我嘗試坐起身，用手指掂一掂佢塊面——冇出現鬼片入面嘅情節，係有實感嘅。
 

而且，雖然我知唔應該對住個不明物體講呢啲，佢塊面好似牛奶一樣咁滑。

 


我拿拿林縮開手，入返正題：「點解你要跟住我？」
 

佢冇答我，只係dup低頭。

 
「喂，我問你做咩跟住我呀？」 

 
佢慢慢抬起頭：「頭先我喺便利店，突然有種全身冇力嘅感覺，到有返意識嘅時候已經喺你屋企樓下。」

 
 
我冷笑一下：「你唔係覺得我會信吓嘩？」



 
 
「你可以唔信架，不過我講嘅所有都係真。」
 
 
「咁點解你而家又會出現喺我眼前？又係有返意識之後就喺度？」

 
 
佢點點頭。
 
 
「救命…」我再次用被冚過頭，我需要時間去消化眼前所見嘅事實——包括我遇到一隻鬼唔似鬼嘅鬼，以及我居然同佢進行對話。
 
 


「如果你真係好驚嘅話，我可以走架…對唔住。」

 
「咁你快啲走啦。」我隔住張被講。

 
兩秒後，我聽到膠櫈聲、腳步聲同埋開門聲。

 
我伸個頭出被舖，見到個女仔（隻女鬼）正準備踏出病房門。

 
唔係憑空消失，都唔係穿牆，而係正正常常咁用兩隻腳行路、用手扭開門鎖。

 


可能因為咁，我竟然覺得有啲唔好意思：「…喂。」

 
佢回頭。
 

「…你頭先話你講嘅都係真？」

 
 
漆黑中，我隱約見到佢輕輕點頭。
 
 
「即係你唔係有心跟住我？」
 
 
佢再度點頭。
 
 
我猶疑咗一陣，問：「我可以點樣幫你呀？」
 
 
佢重新坐喺我床邊張膠櫈，講咗一句意味不明嘅說話：

 
「…我只係想知道，點解我會嚟咗呢度。」
 

「你真係咩都唔記得晒？」
 

佢搖搖頭，應該係「唔記得」嘅意思。
 
 
「…就算我拒絕你，你都會不停纏住我架啦。」先假設佢冇講大話，佢而家嘅情況係唔知自己係邊個同埋喺邊度嚟。
 
 
簡單嚟講，即係一隻失憶嘅鬼。
 
 
「對唔住呀…」佢再次同我道歉。
 
 
或者心底裡我一早認定佢係一隻善良嘅鬼，加上唔幫佢嘅話呢種超日常只會持續落去，所以我冇拒絕嘅餘地：「我可以幫你，不過我有條件。」
 
 
「係咩條件呀？」
 
 
「我唔知你係咪會keep住呢個樣，總之你唔可以整個恐怖樣出嚟或者做啲會嚇親其他人嘅事。」
 
 
「咁你放心啦，我都唔識變恐怖樣嘅。」佢笑笑口咁講，係我第一次見到佢臉上綻放出笑容。