精神科護士的見聞: 8. 靈異特輯（上）

醫院是一個陰氣重的地方，靈異事件見怪不怪。
我做的病房基本上有7個睡房，2、3、4號房最近護士站。
1和7號房分別在左右兩個角落。
試過有幾次7號房病人投訴有烏糟野，要求換房。
問資深一點的同事，他們也未遇過，可能要睡在那裏才能感受到。
我今日分享2個自己遇到的古怪事情。

一、後樓梯的腳步聲
精神病院返夜和普通科醫院返夜不同，空閒好多。
普通科醫院半夜仍會不斷收症，病人奇難雜症甚麼都有。




精神病院半夜都要收症，不過多數1個起2個止。
而病人身體無咩毛病，訓著就一片寧靜。
間唔中有幾個病人失眠，不過佢地都係自己行來行去。
最多搵你吹下水，叫你請下佢食野飲野，無咩特別。
有時得閒起上來，真係陪佢地訓都試過。
有一晚，12點過後，我和IC商量頭尾輪休息。
我要頭3個鐘，佢要尾3個鐘。
果晚唔知發咩神經，我唔去平時去開休息嘅房，忽然想去store room休息。
store room在病房後面一條走廊中，那條走廊有個防煙門，門後有後樓梯通往樓上樓下。
病人唔會有機會接觸後樓梯，平時都係鎖住，費事有人逃走。




只有火災先會用到。
果晚我鋪好床休息一下，可能日頭太累，好快入睡。
半睡半醒之間我聽到有腳步聲，聲音唔係來自病房走廊，而係一牆之隔嘅後樓梯。
那好明顯係高踭鞋嘅聲音，聲音由遠至近，走到我一牆之隔的隔離，然後停了。
我那時嚇了一嚇，不敢掙開眼。
慢慢地那聲音再出現，由近至遠，然後離開了。
我休息完畢，走去望一望防煙門外的後樓梯。
只見一片無盡的黑暗，甚麼也看不到。
我不敢多想，就走出去和IC交換休息。
那次的事我沒有和其他同事提及，直到有一次打風，p更同事都走不了，大家和夜更同事圍住吹水。




成班男人又無聊，就講起聽過嘅醫院靈異事件。
有個同事話，相傳後樓梯會半夜三更聽到有人行路聲，樓上樓下同事都聽過。
我不禁想起自己的經歷，和應一聲。
佢繼續話，不過又有人話係有個女醫生，經常做到好夜，佢又中意行後樓梯，就搞出個誤會。
確實係有個咁嘅人，不過我果晚起碼1點幾2點聽到，而且個女醫生平時無著高踭鞋。
到時果晚d聲係咩，到而家都唔知。
而家每次返夜巡房，我都盡量避開果條走廊，寧願行遠路d。