精神科護士的見聞: 9. 靈異特輯（下)

二、找不到的病人
那時我工作了大約4個月，有一晚如常當夜。
我做收症房看夜會有2個護士1個叔叔，以應付突如其來的入院病人。非收症房就會得1個護士同1個叔叔。
記得果時番左大約兩個鐘，一直無收到收症電話。
本來諗住輕輕鬆鬆又可以過一晚。
忽然收到當值經理電話，話有間非收症房個護士唔舒服，而家要落去急症室睇醫生。叫我快d過去頂佢更。
我心中滿是恐懼。一黎，我未做過果間房，環境又唔熟，又無一個病人係識。二黎，果時我年資淺。去非收症房當夜，一個人番工等同做ic。現今醫院一般都會要新仔做夠一年先會獨立番夜，主要係怕經驗不足處理唔到問題。
當時我房個ic向當值經理表明呢2個問題，佢無視哂，話搵唔到人。（我心諗全醫院又唔係得一間收症房，擺到明係蝦新仔唔敢反抗）
於是我急急腳走去人地房。
對家係個資深護士，交更得幾句：「其實我都唔係好知最近有咩要交，啱先放左個禮拜大假，今朝個早更我又sick左。佢哋話有幾個病人發燒，就丫a丫b丫c⋯⋯（一堆廢話）你自己執生啦。」講完就拍下羅友走人。




真係屌你老尾。
由於我唔熟環境，所以不斷巡視。好彩個叔叔好好人，同我講哂有咩要留意。
我成晚都唔敢休息，只係打下機，打到差不多就行一轉。
到大約凌晨三四點，我又巡視一下。
行到最入面個睡房，見到有個病人醒左，喺到行黎行去。
佢主動撩我講嘢：「阿sir咁生面口，第一次過黎做？」
我：「係丫，俾人賣豬仔咁賣左黎。」
佢：「無事嘅，呢到好和平，同你吹兩句。」
於是乎我地互吹幾句，互相介紹下對方咁。
跟住佢話唔阻我做野，講到呢到就算。




我心諗好彩都遇到好病人，今晚一定平平安安。
之後巡果幾轉都唔見果間房有人行黎行去，佢應該訓左。
到左第二朝6點幾，要叫d病人起身，我就等收工。
我諗住巡埋最後一轉，順便搵果個病人道別。
行到去果到，唔見佢。
周圍搵都唔見。於是我捉住同房其中一個病人問：「丫XX去左邊，唔見佢嘅。」
個病人：「你玩我咩阿sir，佢上年死左喇。」
我仲諗住個病人講笑，就捉住早更丫叔問，都得到同樣答案。

我諗，佢都係留戀呢個地方姐，又無做咩事，仲講說話安慰左緊張嘅我，佢一定係個好「人」。