精神科護士的見聞: 7. 疫情下並不「精神」

有時同d中學同學吹水，話呢年番工都好辛苦。
佢地問點解，我答佢地疫情丫嘛。
佢地都會都有好大疑問，疫情又關你精神科咩事丫？
我而家就話俾大家知有咩關係。

早在疫情初期，醫院就進行兩大重要改革。
一、進行中央收症，一間病房收哂全間醫院嘅症。
二、病人入院後要第二曰做病毒測試（DTS）。

關於第一點，一間精神病院住院服務分左做唔同專科。有成人精神科，老人精神科，懢藥精神科，思覺失調科，兒童精神科




，智障精神科等等。中央收症就係一間病房收哂所有科嘅病人，每人入黎要隔離14日，無事再安排調房。
小弟咁好彩就係做中央收症房，高層每更安排多2個人俾我地，話已經係最大支持。以前一更收2個，已經叫做忙。精神科收症好複雜，查家族咁問病人，仲要病人所有物品都要登記，以防佢地帶刀帶毒品入病房。收一個病人起碼要2個同事做，平均半個鐘收一個人，有時遇到d真係玩嘢，可以搞你一個鐘都未做完手續。
轉做中央收症後，每更平均收4-5個。識計數都知多兩個人無咩幫助。
第二點，疫情初期就話病毒測試喺普通科做，無事先送黎。唔知點解做左無耐，普通科開始偷雞無做測試就送黎，仲聲大夾惡話疫情佢地好忙，你地精神科唔識自己做咖咩。
無奈我哋d老世淨係識蝦自己人，對住出面就死狗咁低聲下氣。最後變左病毒測試要喺我地呢到做。
有同事提出疑問，咁我地好無保障，中招點算。
老世就話，留口水只係病人儲左一啖口水，再吐落化驗樽到，過程係十分安全。
實程係我地d病人唔係正常人，有時會噴到周圍都係。

仲有一樣重點，近呢一年疫情下香港人捱得好辛苦。失業率上升，樓價又唔見跌。大家都累積唔少負能量。




疫情下多左人因為抑鬱焦慮入院，而資源有無俾多我地？多左2個人囉。

其實一早封關就解決問題。一方面醫護做到隻狗咁，另一方面個政府繼續免檢疫放d人入關，遇上呢d「豬隊友」，醫護怨氣不斷累積。到疫情好少少，你唔走去獎勵下醫護，反而秋後算賬要搞罷工醫護。有無諗過罷工係想逼你封關，想香港好。你個政府就話醫護無良心，無責任心。
香港人真係累喇，醫護更加係，對住個咁嘅政府，除左粗口都唔知講咩好。

費時篇野全部都係放負，分享兩個疫情下小故事。
一、疫情初期，果時大家未有經驗。醫院叫我地收症時留意，病人符合兩大條件，同事要提升警覺性。1是有無發燒。2是有無外遊記錄。
有次收到電話要收症，對家特別提醒我地，病人剛從內地過完年返港。收到呢個電話大家都格外留神。
終於病人到咗門口，望落個樣累累地。一同佢探熱，38度。
兩個條件齊哂，我地馬上通知醫生。醫生都嚇一跳，黎到要著好保護衣先敢送走佢，最後都係擔心中招，所以送佢返急症室。




果次嚇死人，我要call人封電梯，做消毒消潔。又要call白車總機，trace番頭先係邊部白車送病人入黎，叫佢地自己要做野。
幸好最後係虛驚一場。

二、自從做左中央收症之後，同事們多數都少左用餐時間。番A會好少少，無咩機會病人會朝早7點幾送黎，P更就難講。而白車送病人黎係唔會理你係咪食緊飯。高層安排人手都係覺得好理想，好似一更內6個人會無時無刻都齊6個，唔洗食飯咁。最後同事為左做好份內事，無奈地扒完個飯就出嚟做野。
有次A更食早餐，分兩輪，頭輪同事食完番黎，到尾輪同事用膳。有個新入職後生仔好勤力，想做多一陣野先去食，我勸佢去食野。
我：「做咩仲唔食野？」
佢：「唔急，做埋d野先啦。」
我：「有咩做交俾頭輪同事，肚餓咖。」
佢：「做埋都唔怕，一手一腳搞掂佢。」
我：「後生仔，我問你個問題，你有邊次p更係可以食足個用餐時間？」
佢：「又真係無。」
我：「係得A更個用餐時間有得食足，你都仲要蝕俾佢？」
佢：「你又講得啱。」
說畢佢就一支箭咁去左食早餐。