精神科護士的見聞: 4. 走投無路的可憐人

何謂「走投無路」呢？一般用來形容一些比較絕望的情況。
例如出街去廁所上大便，辦公完才發現無廁紙。
小弟學護時期有一次深刻經歷。
那次去實習的醫院到處出入都要拍卡，連更衣室也如是。
記得那是我實習最後一天，完結前我去幫護士還東西給其他病房。我的同學們則先走一步，完事後我回到更衣室換衫離開。
那間醫院還卡十分方便，更衣室內有個類似公共圖書館還書的收集箱，放入去就走得。
那時我歸心似箭，好快放入去就完事。
行多兩步到門口，才驚覺：「我屌，卡都還埋，點嘟出去？」
如是者我被困在更衣室。
可憐的我按牆上管事部貼的告示，打電話給管事部職員。




電話那頭先是呆了一會兒，然後半哭帶笑地說句：「馬上來救你。」
幸好最後脫困。不過也感受到無助感及無力感。
我的經歷和以下故事的主角相比，簡直是小毛見大毛。

他叫丫文，50來歲的中年男人。
初次抑鬱症病發，老是想死。
結過婚，老婆好早就過身。
有個仔20來歲，個仔仲有女朋友。
丫文本身都有個女朋友，拍拖數年，佢地4人住埋一齊。





丫文過著半退休生活，本來該是逍遙快活。
可惜他無故患上抑鬱症。
好多人以為患上抑鬱症一定是因為生活不愉快，有好大壓力，其實不盡是。
醫學上發現患上抑鬱症的人腦內一種神經遞質平衡會有問題。而成因至今未知。

丫文初入院，每日都要捉住護士訴苦。
快則半小時，耐起上嚟可以一個半鐘。
捉走一個護士應對單一病人一個半鐘，這是近乎不可能的事。
人手比例大樣1:10，你陪一個病人已經用去一小時，其餘9個病人點算？
不過丫文係一個有修養的人，病房忙佢從不介意訴少次苦。




有時我有時間都會同佢傾下計。

佢話佢以時唔係咁，形容自己係朋友中的開心果。
總是會帶歡樂俾其他人。
病發後諗咩都咁負面，小小事都覺得無力控制，容易絕望。
佢經常諗起以前的自己，就覺得現在自己好無用。
每日都控制唔到自己情緒，忽然會好失落。

或者小弟舉個例子，好多人經歷過分手。
分手初期總會接受唔到事實，不斷自怨自艾，甚至會有想死的諗法。
隨著時間過去，人會慢慢習慣，從而恢復。
而丫文就好似每日都經歷一次分手，每日都想死。

醫生處方了些抗抑鬱藥物，加上每日我地職員同佢做輔導。
最後丫文慢慢病情轉好，笑容再次出現。




記得丫文出院果日，女朋友接佢走。
佢開懷大笑，話多謝我地ge照顧。
仲講笑話得閒入黎拜山，燒下野俾我地。
如果故事去到呢到就完結，丫文就唔會係走投無路。

兩個月後，丫文入翻來。
不過去第二個病房。
從該病房職員得知，丫文出院後頭一個月都無異樣。
忽然有一日，佢落毒害女朋友，然後再服毒自殺。
女朋友死了，佢反而救得返。
最後佢被控謀殺。

我地好多職員都表示難以接受，或者佢果時笑住出院，根本係扮出嚟。
佢主診醫生初入江湖，佢一聽到呢個消息，都不禁落淚，最後要休息幾日調理自己。





我分享呢個故事，並唔係想話俾大家知咩活在當下，做人要樂觀面對困難。
也許世界上有好多可憐人，普通人根本不能理解佢地的痛苦。
如果有一日，身邊有人向你訴苦，請認真聆聽。
也許你改變不了結果，但至少你陪伴過佢，曾經同佢一齊行落去。