精神科護士的見聞: 5. 學護第一關

上一篇有點沉重，呢篇講d輕鬆少少嘅野。

Nursing係比較特別嘅一科，基本上讀完出嚟條路就確定左。
正因如此，讀嘅過程唔會輕鬆。
五年制大學生活（Nursing特別多一年），頭一年好玩盡佢。
第二年開始會學d實用性高嘅野，準備暑假去醫院實習。
一d護士生涯常用嘅技能，都係呢個時候學。

當時學完都未夠，仲要過學護生捱第一關——Skill test。
教室我地稱之為lab，lab會模擬病房環境。有病牀，唔同儀器，假人公仔等。




我仲記得果時要考兩次，一次期中考，一次期末考。
考試流程如下：
1. 到一間課室報到，然後貼上貼紙，貼紙上有你個人資料。所以考生都喺到等叫名。
2. 叫名後，會安排你到考場外等候，大約3-4人一組。
3. 到你果組考，就會安排你抽考題，抽完有幾分鐘時間閱讀。
4. 然後會有人安排你去所屬地方考試（考場大約有4個唔同地方），老師會同你講多次個senario。
5. 有兩分鐘時間執齊你要用ge工具。
6. 開始考試。
7. 考完走得。





考嘅時候，會有兩個人喺到。
一個係病人，病人由師兄師姐扮。
一個係老師，負責俾分。
如果夠好彩，個病人仲識配合你，引導你完成考試。
不過總會有d心地唔好嘅師兄姐。
試過有人扮病人時專登玩嘢，交多咗戲，搞到考生肥佬。
考試內容都幾多，簡單嘅例如量血壓，round片，驗尿。地獄級嘅例如打針，插胃喉，插尿喉等。

我期中考十分幸運，抽到驗尿，加上我考前練習充足，輕鬆拎個B。
期末果次就無咁好彩，我發燒病左幾日，連練習都無做。考果陣仲未病好。我抽到驗大便，本應十分簡單。可惜我大意，拎起個屎pan就咁隊俾個病人，個病人呆左咁望住我，老師即刻面都黑埋。原來劇本係病人行動不便，要你協助佢，令佢訓喺床上都留到大便。好彩病人心地好，不斷指住下半身話隊落黎，仲遞高patpat就我，先做完。





考完大家會坐埋一齊討論考成點，有個同學悶悶不樂，我就同佢傾計。
我：「考成點丫？」
佢：「肥左。」
我：「你抽到邊題？」
佢：「抽胃喉。」
我：「唔怪得之啦，地獄級題目。」
佢：「其實我練到好熟，唉⋯⋯」
我：「咁你衰咩？」
佢：「我同個病人做完檢查，執好工具，拎起條喉準備隊入去，但係個病人反抗，仲捉住我隻手。呢個時間老師話stop，我先知自己緊張過頭，太過投入落個情景到，忘記左考試係插落個假人到。」
我：「er⋯⋯」

要成為一個護士，其實並唔簡單，要學好理論，仲要反覆練習d技巧，仲要經歷無數次失敗。