精神科護士的見聞: 3. 神經俠侶（下）

一對情侶情到濃時，拖手接吻甚至乎XX乃至人之常情。
更何況是一對分隔兩地，每日見面只有2個鐘的情侶。

阿權的老婆每日都會來探佢，而我間唔中都會負責探病室。
佢地兩個真係好恩愛，佢老婆又十分黐纏。
佢地總會趁人少少，把手拖上，然後輕輕錫幾下。
作為護士，我有責任阻止佢地呢d行為。
試過有情況，其他病人投入情緒太深，又要攬又要錫，搞到探完病情緒波動，醫生覺得無助病情轉穩。

而阿權呢對夫婦，每次想錫錫，我都選擇擰開塊面，當睇唔到。其實入院已經好慘，有同理心都唔會阻止佢地。





有次探完我忍唔住，問阿權：「你地兩公婆點識咖？」
阿權話：「其實我後生已經病發，當時經常出入醫院。醫生擔心我翻屋企好快又唔食藥，要我每日返醫院嘅日間中心，我同老婆就係中心到識。」

原來佢老婆都係院友，大家同病相憐，惺惺相惜。好快就拍拖仲結埋婚。後來仲生左個女，而家10歲。不過佢地兩個都各自有各自病發入院，無能力照顧個女，所以個女送左去兒童之家。提及女兒，阿權都覺得對佢唔住。生左佢出嚟，但係又無養育過佢。

後來阿權諗通左，養育唔到個女，起碼有個老婆。大家互相扶持，希望有一日可以病好。就算病發都要互相支撐，永不放棄。

就係咁，阿權住左大約一個月，病情穩定出左院。





3個月後嘅一日，我又喺醫院見到阿權。
我如常準備返工，走回病房的路程中，撞到著便服的阿權。
阿權：「X sir！」
我：「咦？！你做咩又返來？探我丫？」
阿權：「唔係丫，我老婆入左院，我黎帶日用品俾佢。」
我：「原來係咁，今次到你去日日探佢喇喎。」
阿權：「係丫，今次到我支持佢。」

連普通情侶都可能大難臨頭各自飛，呢對「神經俠侶」真係做到互相扶持，真難得。





大約一年後，我和女朋友在逛街。
忽然身後有把聲叫：「X sir！」
我：「你咪阿權，好耐無見。兩公婆行街街丫？」
阿權：「係丫，我地食完飯周圍行，唔阻你拍拖喇，拜拜！」
道別過後，我望向佢地ge背影，不禁慨歎，呢對夫婦雖然多災多難，不過完全無影響佢地感情，真係無得頂。