你是一名在戰場上的無名士兵: Real - 第二章 - 8

昨天黃昏的晚飯令你回味無窮。雖然戰友們的目光令你們都不敢再說半句話。但對你來說已經是一個難忘的回憶，特別是所有人都跟着你們回到旅館。在出門的一刻，到經過兵營、街道，甚至門口、接待處，他們還跟上二樓，「喂點解你哋唔一齊瞓？」「雪倫小姐，我都想同你食飯！」「可唔可以畀我住埋呢度？」「你哋係咪真係咁啱撞到？」你們就像那些貴族一樣，被一大羣打聽消息的平民追趕，然後愈傳愈開之類的。

「我諗大家都攰，不如我哋之後再好好交流下？」你站在自己房間前面，雪倫用雙手搭着你的肩膀靠在你背後。「係囉，我哋依家想放鬆下。」「等陣，妳講咩 -」「原來係咁。小心唔好嘔出嚟。」「我哋都無謂喺度阻住副隊長。」「雖然我好有興趣，不過我哋都係返去啦。」就在你和他們相隔不遠時，他們似乎認為你們要處理一些重要事便離去。「妳咁樣只會令誤會變得更大。」然而你完全沒有這個意思。

「咁樣落去佢哋都唔會走㗎啦。」她放開你。「講開走......」「做咩？」「隊長話要我放假。」「放假？但依家仲打緊仗。」「佢話咩雙方都需要時間休息，我覺得冇咁簡單。不過再諗落去都冇用。反而我想問下，」「問咩？」「我想叫妳陪我一齊去。」「咩話？你想將誤會變成事實？」她退後了幾步，「唔係，我唔喺度，你又咪係對住佢哋。甚至佢哋打過嚟嗰度冇人可以保護妳。」「又係。咁我今晚諗埋去邊啦！」「麻煩晒。」「完全唔係問題。我幾乎每個地方都去過幾次。」

「最快可以幾時出發？」「要請馬伕，買糧食，計劃行程......應該要幾日。我哋去幾耐？」「隊長話最耐要個半月返嚟。」「咁我知喇，」她點了一下頭，「你瞓先啦，我哋應該都好攰，特別你啱啱食食下差啲冚咗落碗飯度。」「冇錯，早抖。」「嗯。」

你走進房間，馬上爬上床便睡着了。過了數天，一切都已準備好，你坐上馬車，仰望青空，以及無視在馬車外面擾攘的士兵們。「點解副隊長要走？」「你哋兩個想私奔？」「出嚟答下我哋啦！」「點解隊長可以唔同佢哋解釋？」你對坐在對面的雪倫抱怨。





「各位！」隊長的聲音從人羣後方傳來，將士們紛紛讓開位置，「副隊長今次遠行係有目的嘅，有咩目的我唔可以講。」「咁佢去邊？」「呢樣我都無可奉告。」「既然隊長都咁講，我哋就祝副隊長可以安全返嚟啦！」「副隊長！希望你可以達成任務！」眾人的呼喊隨着馬車遠離而減小。

「雖然我係放假，唔係真係有咩任務......」但換句話說，隊長是可以希望你從目的地帶來有用的情報，卻沒有特定的地點。萬一你選錯地方的話要怎麼辦？「話時話，妳點解想去安杜城嘅？妳有咩人要見？」你感到疑惑。

「幾個月前嗰度發生咗叛亂，我想同個朋友一齊走，但係個朋友話要照顧家人而留咗喺嗰度。」雪倫解釋。

「哦~咁你見返佢一定會好開心。」你嘗試安慰雪倫。「我都好想知佢依家點，希望佢冇事啦......」雪倫有點傷感地說。

顛覆的馬車、高飛的雀鳥、搖曳的樹葉，帶來些許戰場的感覺。但寧靜告訴你這是虛幻的景象。不過比起不存在的戰地，這樣在戰時卻可以任意，應該是自由地選擇旅行目標的現實反而更不切實際。你們打算經過愛莉密斯之城進入愛利文帝國的邊界，再直接前往安杜城。秋色在耳邊低語，你在涼風的呵護下閉上眼睛。





「我哋到喇。」「吓？」你往馬車外望，第一時間映入眼簾的是人來人往的街道。「快啲啦！」她拖着你的手走出馬車，「呢度就係安杜城？」你轉了一個圈，每一個方位都有路人、馬車經過。「不過有啲涷......」你打了一個噴嚏，「穿返件褸先啦！」她拋一件大衣到你手中，「快啲拎埋啲行李！」她傳遞給你兩箱行裝，「好重......」你默念，「嗰間嘢係邊呢？」「等埋我，唔好行咁快！」雪倫到處亂跑，好像在嘗試找什麼東西。「妳搵緊咩啊？」

你跟着她，在流了不少汗來到一間旅館。「係依度喇！」「妳個朋友就喺依度？」「快啲入去啦！」你和雪倫推開門進了旅館。

一進門，你看見一個男人衝出來和雪倫打招呼，「小姐！你返嚟搵我啊？」「係啊，我係專程搵你㗎。」雪倫和那個男人說。

「咁啱嘅，我都有啲嘢搵你。你跟我入嚟先啦。」那個男人說。「我可唔可以跟埋入去？」你問。「唔得，呢啲係私人嘢嚟。」那個男人一口拒絕。「巴奇你喺度等陣先，我好快返嚟。」雪倫和那個男人進去接待處後你等了數分鐘，你突然聽到雪倫的尖叫聲。
「啊！」

「雪倫？」你馬上嘗試打開門把，卻發現，「唔係啩，鎖咗嘅？」你不斷嘗試大力推開門，但都不可行。「有冇啲咩？」你看着腰間的劍。





你拔出劍，準備將門刺穿。正當你要一擊打下去的時候，雪倫打開了門。「喂！等等等等等等等等陣先！」

你看見雪倫傷痕累累的樣子，「頭先發生咩事？」你慌張地問雪倫。「啱啱條友伏我，想隊死我。」你看見雪倫身體搖擺不定。

「不過我都喺佢身上面搵到啲嘢嘅。」你看見雪倫在身上拿出一張便條。

便條上寫了一個符號：「T。」