你是一名在戰場上的無名士兵: Real - 第二章 - 7
「好彩你冇做啲出醜嘅嘢，如果唔係你連自己死咗都唔知。」隊長說。「我明白。」你盡量控制雙腳不顫抖，「呢幾個人都係痴線，實力仲喺我之上。如果對住佢哋，你唔會反應得切，睇到都擋唔到。」隊長補充。「咁點解佢哋唔上戰場？」「佢哋自有佢哋需要做嘅嘢。」隊長在溫斯倫之城畫了一個深藍色的圓圈，「雖然我地已經決定咗去打邊度，但係我哋都有需要休息。我哋會休息兩個月。」羅傑斯隊長說。「咩話？兩個月？我哋應該盡快攻過去。」
「我哋畀人打完仲要攻入一座城，本身就係極大消耗嘅行動。而且我哋好多人都傷咗，資源都要補充，連呢度都要整返好先。」「咁樣啫係畀機會佢哋休息。」「我哋都要休息。咁係無可奈何。依家再做任何嘢都一定會令我哋喺度嘅全部人陪葬。」「咁佢哋攻返嚟。」「佢哋唔會，你諗唔諗到點解？」「吓？」你們明明損失慘重，兩天的行動也將許多人的精力磨滅，你想不到任何理由。
「我諗唔到。」「哈哈哈。」「隊長你笑緊咩？」「答案其實好簡單，」他拍了拍你的肩膀，「我哋依家好似一枝箭咁插入佢哋領土係咪？」「係。」「啫係佢哋可以從四方八面圍住我哋。」「冇錯。」「雖然實際上係得兩座城連住依度，但如果佢哋夠膽集合埋其他地方嘅兵，會發生咩事？」「佢哋嘅國土邊界、或者內部會變弱。」「假設佢哋察覺到呢個問題，我哋直接講內部變弱呢個問題。冇錯，佢哋前線係可以一舉殲滅我哋，但當內部脆弱嘅時候......」
「等陣，隊長你點解咁肯定佢哋要向其他地方借兵？」「因為我哋有條線一直連到首都，佢哋會覺得我哋會運兵過嚟。」「咁我哋會唔會？」「你想問佢哋聽日又會打返過嚟？唔會，雖然我哋處於被動，但實際上佢哋輸咗兩場，佢哋冇咁多資源。」「所以係咁啱，短期佢哋唔夠料，長期我哋又已經準備好。」「就係咁。」
「我講返內部脆弱嘅問題。相信你知每個國家都會派啲刺客潛入去其他國家。」「所以會畀啲刺客有機可乘？」「冇錯。」「但係呢啲只係隊長你嘅期望。」「不過如果唔係咁嘅話，我哋都輸緊。而且每行錯一步都有可能令戰況改變，對我哋定佢哋嚟講都一樣。」
「所以佢哋因為喺邊界唔清楚其他國家會唔會幫我哋，同驚有人趁機搞事就唔會攻過嚟。」「就係咁。好，仲有冇嘢想講？」你聽完隊長的解說，再觀察地圖，「隊長，佢哋會唔會全部估到晒？」「估到我哋都要打。」「咁我冇問題喇，隊長，我告退先。」「等陣先。」「做咩？」「我畀你放假。」「放假？我哋仲打緊仗。而且我哋唔肯定佢哋會唔會打返嚟。」「老實講，多你一個少你一個都冇所謂。」你聽到後覺得被無視，「咁我想問我放假對呢場戰爭有咩幫助？」
「梗係有條件。第一，你只可以去愛利文帝國或者加斯林帝國。第二，如果同我報告你見過嘅特別事物或者人。第三，可以帶埋佢哋返嚟最好。第四，最遲一個半月之後返嚟。」「隊長，你係想叫我搵啲奇人異士幫我哋？」「點會呢？你唔好以為所有嘢都喺我掌握之中，我甚至只係其中一個同你一樣畀人迷惑嘅人。」「哦，遵命。」你覺得很無奈，懷疑自己是否被發放邊疆，不過既然有放鬆的時候便要享受，「咁我出返去先。」
與其這樣說，你覺得自己正被甚麼擺佈，一種無形、無色的線。你覺得自己是自由的，你可以任意選擇，但實際上不是。你走回旅館，發現雪倫還在清理。「你返嚟喇？咁快啲幫手？」她遞給你一塊布。「好 -」「等陣，你對鞋喺門出面。」
你穿回靴子後和她一起收拾爛攤子，直到黃昏。「終於執完，」她伸了一個懶腰，「雖然個櫃台爛晒。」「我想瞓先。」你拖着疲倦的身體走上樓梯，「企喺度。」「又點？」你回頭，「我連續兩日都喺度抹嚟抹去，你知唔知要點做？」她的白裙又被汗水佔據。「唉......放過我好唔好？」
在你們換了一套比較可以見人的衣服後，你穿着早上的便衣，雪倫穿着你第一次遇到她時的服裝。你把她帶到一間餐館，軍隊把裏面的食材搜刮，並讓士兵們在這裏用餐。「你叫啦。唔使錢。」你把頭趴在桌上。「你自己唔使食？」她用紙製餐單拍打你的頭。「我想瞓覺多啲。」你抬頭看了她後又倒下來。餐館內還有其他士兵在用餐，而你覺得他們都在看你們，更準確地說是盯着雪倫。而且在你們進來的時候已經一直是這樣。
而且他們還在不斷討論，「點解巴奇會帶埋個女人嚟？」「佢哋今朝整爆咗間旅館，應該一早夾好。」「佢哋進展都幾快下。」「點解我冇女，佢有？」她用手搖晃你的頭，「好多人睇緊我哋，你可唔可以唔好咁？」「但係我真係......」你看見她擺成一副可憐的表情，「好，」你馬上挺直身子，「咳咳咳，」你把目光驅散，「妳想食咩？」「我想食呢個。」她指着一道菜式。
「雞？冇問題。我幫妳叫佢整。」你走到廚房，「唔該我想要 -」「排隊啦，副隊長大晒？」其中一個處理伙食的士兵正在把湯倒到鍋裏。你覺得被輕視，「係。咁你有咩意見？」「對唔住副隊長，你想要咩話？」「睇嚟副隊長呢個位又唔錯。」你暗暗竊笑。
「你哋想要咩就同佢講啦。」你回頭對擠滿人的隊列說，「咁副隊長你呢？」「都唔係我食。女士優先。」「老闆唔該我要......」雪倫從門後伸出頭，你回到餐椅上，看見全部人都注視你。「咩啫？我咪話唔係我要食，嘢都唔係我要。我絕對冇持住自己係副隊長就濫用職權。你哋班男人先要讓下人哋......」「我哋明嘅。辛苦副隊長！」所有人向你行禮，「咁又太誇張。」「老闆話會整多份畀你食！」雪倫坐在椅子上。其他人又用不滿的目光盯着你，「唔關我事！你問返廚房佬！」
「放鬆下啦。」一位站在牆邊等待的士兵認為你反應過度。其他人也回去各自做自己的事。「嚇到我......」你呼了一口氣。「你真係要冷靜一下。」「做咩？」「冇，食完嘢先。」