你是一名在戰場上的無名士兵: 第10章 - 5

「仲有，我喺走佬嗰陣見到有隻嘢好大隻，應該講，係會變得愈嚟愈大，仲要痴咗線追住我，但係嗰隻嘢追到城門就冇追嚟。」你不想再回想被怪物追趕的景況。

「嗰隻嘢唔單只識變大，仲跑得勁快，但係睇嚟佢係要留喺座城入面。」你說。

「會唔會係嗰隻嘢同我哋要搵嘅人有關？」雪倫說。「可能係，睇嚟我哋要去多次座城。但係座城喺加斯林帝國。」你說。

「加斯林帝國？你點去到嗰度？」雪倫露出驚訝的樣子。「我都唔知，我諗你都覺得成件事都變得好奇怪，甚至呢場戰爭只係掩飾一個更大陰謀嘅誘餌。」你想等到有更多線索才告訴雪倫你得到的資訊，不然這樣只是大海撈針。

你看着桌上已被吃得所剩無幾的食物，決定先把話題停在這裏。「如果唔係，我可以自己搵下有咩線索。」雪倫提議。「千祈唔好！我哋乜都唔知就盲衝衝咁去，可能又會好似上次中佢哋嘅陷阱。」你實在不想因為自己的魯莽而再犯下錯誤。





「咁好啦，或者你喺下個禮拜會搵到啲線索。」雪倫說。「希望啦，我哋都係時候走。」你把店員叫來付帳後，一個箭步衝到雪倫旁邊。「咁我返去先......你做乜嘢？」當雪倫正想站起來時，你把她抱起。

這當然吸引了很多人的目光，「放手啦......」你聽見雪倫小聲地說展露出她的羞怯。「我哋明嘅......」你聽到右邊一位年老婦人稍微歎了一口氣。「你哋趕返嚟之後，係咪所有人都知道晒你哋畀人偷襲？」你在雪倫耳邊問。

「你點知㗎？」雪倫裝作想掙扎的樣子，實際上是很像很享受般。
「啲人好似睇穿晒我哋啱啱先經歷過九死一生咁。」你一步步走向餐廳的門口。「冇錯，其實依家有好多人嘅士氣都好低落。」你打開門，回到被暮紅包圍的街道，雪倫則是失落地說。

「既然係咁，點解要咁急？」你放下雪倫，她拍了拍衣服上的塵埃。「我點會知軍人，或者係上面嗰啲有權力嘅人點諗？可能係想突襲之類。」雪倫似乎對你的問題不滿。「都係嘅......咁我走先。」你決定回到自己的房間再整理目前獲得的情報。「等陣先！」雪倫叫停了正背向她離去的你。

「做咩？」當你提出這個問題時，她馬上以擁抱回答，「唔好死。」「我盡力啦。」除了這個回應，你想不到任何在你能力以內又動人的說話。你把手放在她的背後，百感交集。





你和雪倫分開後，回到自己房間。「如果我想自己解決呢件事，咁我就要搵啲方式潛入去......我個朵已經響晒，應該係冇可能......」「再加上，如果又撞到啲唔知咩人，好難確保佢哋唔會搞我，就算係佢哋兩個，佢哋都可能會傷害我.....」「唔通我真係要跟住嗰個人嘅棋行落去？」明明已經知道事情的陰暗面，你卻甚麼都做不到。

「咁諗落去都冇辦法......不如就.....」你想到一個可以兩全其美的方法。在想到這個方法後，你決定和尼克繼續討論。