你是一名在戰場上的無名士兵: 第10章 - 3

你看着她那差點便碰到肩膀的頭髮，「我想問，妳叫咩名啊？」「派齊莉，你既然知道我個名咁之後有嘢要你幫手都易啲。」派齊莉說。

「派齊莉，好高興認識妳。我叫巴奇。」你伸她在胸前交叉的雙手，不過她完全沒有要理會你的意思。「你就係嗰個劉巴奇？」「係。」「估唔到其中一個我要特別留意嘅人不請自來，仲要扮到想追女仔咁......」你能聽出她提高了警戒心。

「既然係咁，下次再見啦。」她往大街走去。「啊......」「唔好諗住跟埋嚟。」她用手指着背向她的你。雖然你很想跟過去，但她應該是去跟同伴見面，隨便行動可能會有危險。

因此，你決定去酒館喝一杯整理思緒。你走進酒館，鈴鐺響起後你又回到了這所繁華的酒館。「唔該我想要枝蘋果酒。」你說。「好！好快嚟！」侍應說。

當侍應在準備時，你看了看周圍的人。你在右邊看見一個很熟悉的身影在獨自大喝特喝。「尼克？」你說。





他在喝下一口的時候向你的方向盯了一下，然後他馬上大力放下酒壺，有些酒也彈到桌上。「巴奇！」他口中的酒也有一點溢出來。你坐在他旁邊，「你冇事？」「差唔多有事。我同你講，當我哋走咗出嚟，搵返其他人之後，又有班人衝出嚟。」尼克激動地說。

「跟住呢？」你追問。「由於實在太突然，再加上佢哋真係太多人，羅傑斯隊長決定棄城，我哋就突圍出去，不過都傷亡慘重。」
尼克聽起來彷彿完全不想回憶起來。

「我哋用幾個鐘跑返嚟，不過有啲人頂唔順，羅傑斯隊長帶咗佢哋匿埋，佢哋依家仲喺出面。」尼完愈說愈快要崩潰。「雪倫呢？」你問。「佢跟咗我哋返嚟，其他人都一樣。」尼克為了釋放壓力而嘆了一口氣。

突如其來的伏兵，神出鬼沒的綁匪，布朗斯帝國是怎樣做到的？雖然你有些小頭緒，但她說過不用擔心那一方面的事，似乎現在你只能按着對方走的棋來應對。

「我哋咁辛苦走返嚟，跟住佢又講要打返去，想攰死人咩？」尼克抱怨。「軍令不得不從。」你說。「咁就唔好講啲咁唔開心嘅嘢，飲返杯先！」他舉起酒壺。「你真係嚟得啱時機。」你接下侍應的蘋果酒並付帳。「多謝幫襯。」侍應走回去繼續接待客人。





「我哋今日隊盡佢！」你舉起酒。

「咕嚕咕嚕......」你們兩人也不知道叫了多少瓶酒。「巴奇......我同你講，其實......你真係我見過最重情義嘅人。」尼克的臉都紅了。

「係咩.......？點解你會咁諗？」你自己也覺得有點暈的感覺。「你啊......攻城嗰陣又識出策......又會親自落場打......仲有呢，唔講唔得。你幫嗰兩個女仔真係好有型。」尼克說。

「啊哈哈，使乜客氣啊。」你說。「仲有之前你隻身一人同嗰個格.......你得林？之類啦嗰條友隻揪，我都知你有啲料。」尼克大笑。

「話時話，你最近係咪升咗職？」你問。「係啊，我由兵長，升咗去做士長啊。」尼克說。





「我真係覺得你好勁㗎姐。」你說。「點夠你勁啊，你由一個普通士兵，直升咗去做副隊長，咪話唔把炮啦。」尼克說。

「啊哈哈哈哈哈。你真係，其實我都估唔到我嘅策略會咁成功。可能只係因為巧合姐。」你說。

「戰場上面係冇巧合㗎朋友，只有行動同衝動，呢兩樣嘢就構成咗戰場上面嘅一切。」尼克說。

「你都講得啱啊。」你說。

「係呢，你最近點樣啊？」你問。「你覺得點樣？攰到想死。一件事完咗又嚟第二樣嘢，更加唔好講呢幾日。」尼克把頭靠在椅子上。「係啊，可能會無啦啦就畀人捉走咗。」你說。

「我真係有啲煩惱囉。」尼克說。「我都唔知呢場仗幾時先打完。」尼克說。「仲有排啊，雖然我哋依家有好多新武器啦。」你說。

「你又啱。兄弟，我哋今日啪盡佢！」尼克說。「好！」你說。





你們在經過一個下午後，已經快要醉得不省人事。「啊......哈哈，真係好盡興啊老友。」尼克說。「係啊，我都好盡興，我係時候要走。」你說。