你是一名在戰場上的無名士兵: 第9章 - 3
在一片黑暗中，有兩個人在觀察。「點解妳要咁做？」一個穿着褐色長袍的男人正對一個矮小的女人說。「我點知啫！所有嘢都冇問題咪得囉！」同樣穿着褐色長袍的女人像發脾氣般說。「咁樣都叫冇問題？」男人指着螢幕，你看不見螢幕顯示的影像。
話說回來，「螢幕」是甚麼？「鍋爐」又是甚麼？明明不會英文，自己又怎麼會說出「Fire In The Hole」？
「就算依家睇落冇事，之後嘅發展可能已經唔同。」男人說。「其實依家個發展已經完全唔同，只係結果一樣。」女人說。「妳知就好啦！依家再做啲咩都於事無補，再等下啦。」男人說。「係。」
女人向一道光走去。「妳諗住去邊？」男人說。「係...」女人走回來。
--------------------
「我喺邊？依家幾點喇？」你發現自己躺在地上，猛烈的陽光直接照射你的眼睛，「哇！」你馬上起來避開陽光，你不知道這裏是哪裏，但這裏是一條街道，人們正做着他們自己的事。
你發現你旁邊的長椅上有一封信。你撿起信。
「你知唔知你係邊個？你知唔知我係邊個？你知唔知係我帶你嚟依度？如果你想知我係邊個，咁就行入你前面間屋仔啦。」信上如此說着。
「如果真係佢帶我嚟，點解佢要拋低我喺間屋嘅前面，等我醒咗再入去？」你覺得這個人在故弄玄虛。
你決定走進小屋。你進去後看見兩張椅子和一張桌子，只有從左上方的窗戶透進一點光，其中一張椅子上擺放了一封信。
「多謝你入嚟啊！點解你唔睇埋第二張櫈上面有咩呢？」
你望向另外一張椅子，發現突然有一個淺藍色頭髮的女人坐在那張椅子上，你頓時嚇得退後了兩步。「啱啱明明冇人㗎....」
「請坐。」她用黃色的雙目看着你。
「你係邊個？」你坐下來。「你好快就會知。」那個人說。「咁我要點離開依度？」「你唔會想知依度係邊度咩？」「雖然我想知，但我想返去我啲同伴度先。」
這裏很溫暖，應該不是北方，也不像你的家鄉，難道這裏是加斯林帝國？「答啱喇。」她說。「妳知道我諗緊咩？」「呢度只係你嘅夢境。」「咁我到底要點離開依度？」「你冷靜啲先。」
「你依家就好似一啲受到過度創傷嘅人咁，暈咗。」「咁啫係？」「除非對你造成創傷嘅嗰個人叫返醒你，唔係你要留喺度一排。」
她雖然年輕，但散發着肅穆的氣息。「肅穆？哈哈哈！完全唔係咁嘅一回事！」她笑起來。
她笑得差點從椅子上掉下來，「不過呢，喺現實嘅我都唔會知我同你見過，算啦。」她抹掉淚水。「既然我未見過妳，咁點解我又會發夢見到妳？」「可能係有啲嘢搞錯啦。」「係咪發咗啲可以知道未來嘅夢？」「可能啦，你見到我嗰陣一定認得。」
「真係好漫長。」你在心中數着一秒一秒的過去。「如果我死咗，我係咪成世都會喺度？」你問。「我又冇諗過呢個問題，如果你死咗嘅話，就唔會發夢。所以單就會唔會留喺度，我覺得唔會。」
「我哋要唔要出去行下？」她問。「好，好啊，我都係第一次嚟依度。」當你打開門後，門後只有一道白光。「睇嚟你都差唔到醒喇。」她說。「吓？」「咁就等我哋第一次見嗰陣再講啦！」她化為灰塵，當你想捉住她時，她已經不見了。
「醒啦，醒啦....」你閉上眼睛待白光吞噬你。
你張開眼睛。你發現自己正被穿着粉紅色長袍的人抱着，以非常快的速度向前跑。「你醒咗喇？」她說。她的聲音令你有一種特別的感覺。「凱倫？妳係咪叫依個名？妳點解會喺度嘅？」你說。「時間無多，我哋快啲走啦。」凱倫繼續跑。
「其實我哋依家喺邊度？」你說。「十五年前發生爆炸嘅嗰座城。」她說。「其實我同你根本唔應該有任何互動，但係既然佢哋玩到咁....」「佢哋係邊個？」「你冇需要知。當你需要嗰陣再同你講。」
你們正向城市的東門跑，「老老實實，呢兩日發生咁多古怪嘢係咪妳搞出嚟？」「有一部分啦，只不過我哋都係照返佢哋做嘅嘢做出相應嘅行動。」「咁啫係係妳喺我後面射咗三箭。」「唔射你會死，我哋唔想你死。」「點解呢？我都唔係咁重要啫。」
「你死咗嘅話會對未來有好大影響。」「你肯定講咁多嘢唔會畀妳阿頭照肺？」「唔講都講咗，只要結果好咪得。」「呢個世界唔係結果好就得，你要諗埋同妳一齊做嘢嘅人嘅感受。」「你真係好煩，係我救咗你，你唔識感恩仲要鬧我？」
「使唔使哥哥教你咩叫尊重？睇妳個樣都唔係好大，個人咁串？」「今次真係大鑊，佢離我咁近即刻......」你聽到凱倫在碎碎念。「做咩啫？唔夠人講就咒人？」你說。「你唔好嘈啦！」她突然把眼灑在你身上。
你看見她這樣也不好意思再說話，「啊！！！！」你聽到一個女性在叫。「妳聽唔聽到有人叫？」你問凱倫。「咩聲啊？我乜都聽唔到。」凱倫說。「唔係喎，真係有啲奇怪。」凱倫把你放下，「喺邊度傳嚟？」她問。「喺嗰間屋。」你指着後面一座肉色外牆，若兩層高的建築物。
「我哋check下就走。」她和你走到建築的門前。「乜謝？」「講錯，我哋睇下就走，佢哋仲追緊嚟。」凱倫拿出了一把劍，但是劍刃呢？
「妳依個係咩嚟㗎？」你問。「呢樣係未來嘅一種武器，你唔使理。」凱倫說。
突然，劍發出了一種你不懂得如何形容的聲音，然後露出了一段光線，難道那就是劍刃？
你見凱倫用劍在門上開了大洞，然後就進去了。
「唔好入嚟！」你聽到凱倫在裏面大喊。你決定留守在原地。「入面做咩？」你向屋內大喊，你聽到裏面有男性慘叫的聲音，很多種你不懂如何形容的聲音，就像火槍發射，不過混濁了許多。
過了一分鐘後，凱倫從門內出來。「哇，頭先好險。」凱倫抹了一下汗，好像經歷了些什麼。
「啱啱發生咩事？」你問。「係伏嚟㗎，佢假扮有人，實際上係想捉咗我地兩個。」凱倫說。「又係嘅，依度荒廢咗，點會無端端有人。」你說。
「咁我哋快啲走。」你說。「使唔使我抱你？」凱倫說。「妳抱我快啲，梗係要。」你說。「你肯定淨係因為快啲？」「肯定，冇任何其他嘢。」
「好啦。」凱倫抱起你繼續跑。你隱若看見突然有一個龐然大物從後面走出來。「嗰個係乜嘢嚟㗎？」
「就係呢樣嘢嚇到我跑出嚟！佢會慢慢變大，真係嚇到我唔知點算！」凱倫說。「今日到底發生乜事？」你大叫。
那個龐然大物就像由許多石塊堆積而成，不是一個完整的物體。「嗚噢噢噢噢噢！」它咆哮。「佢仲識叫？到底係乜鬼嘢嚟？」你說。「就到喇！」凱倫說。突然，它拋出兩塊巨石擋住了去路。「咚！咚！」「你唔係咁樣搞我啩！」凱倫說。
她轉右進入小巷，打算繞過陣礙，「快啲，快啲啊！」你看着它慢慢接近。「跑緊㗎喇！」凱倫加速，她繞過後返回街道向城門跑。