你是一名在戰場上的無名士兵: 第9章 - 4

「呢嚿到底係咩嚟？」當凱倫抱着你跑向早已有一堆碎石堆積的城門時，你繼續看着它追來。「到喇！」當它踐踏了數間房屋時，凱倫在碎石間奔馳。

當你們踏出城的一刻，它便停了下來，並「啊....... 」地咆哮了一聲，差點把你的耳朵震碎。「我諗我有啲頭緒。」凱倫在離城門一百米的平地上把你放下。

「咩頭緒？」你拍下衣服上的塵埃。「我唔可以講，等到啱嘅時候再講。」凱倫望向它。「咁我哋要點返去？」你問。「等我睇下先......」凱倫拿出了一個只有約一塊手帕大的白色方形物體。中間有一個墨綠色的平面。

當凱倫按下在它側邊的一個紅色按鈕後，平面突然彈出一張淺藍色、由一點點組成的平面圖，你伸手想摸它，但當你的手去到它的位置，甚麼都摸不到。「咩嚟㗎？好恐怖！」你有點毛骨悚然。「呢樣係未來嘅產物，你當係地圖啦。」凱倫在平面圖上捏來捏去，平面圖的形狀也產生變化。

「等我睇下先.....」凱倫在平面圖上滑來滑去。你望着城的位置，龐然大物早已消失。「哇！」凱倫掩住嘴巴。「做咩？」你轉頭問。「我哋依家喺東南邊，一個叫「斯丁」嘅地方。」「依個就係呢座城嘅名？」「你依家應該係咁叫嘅......」「你嚿嘢可以睇埋同一地方唔同時間嘅樣貌？」「點解唔得？十蚊嚿。」「雖然我唔知咩叫蚊，但應該好平......」





「唔理喇，咁我哋點返去？」你問。「你想嘅話我可以帶你飛上天。」「真係？」「講笑。」「佢哋有嚿嘢可以帶我嚟依度，咁妳應該有方法嘅。」「係得，不過要傳統啲。」凱倫拿出一把類似火槍的白色物件，不過要小許多。「妳呢個又係咩嚟？」「可以任意叫啲自己想要嘅動物出嚟嘅嘢。」凱倫在閉上眼睛後分別向左右的地下開了兩槍，槍口射出了兩道綠色光線，光線逐漸變成一隻棕色馬。

「我會唔會睇得太多，妳會唔會殺我滅口？」你問。「你睇咗都冇問題，你又唔知點整，你同人講，佢哋只會當你係痴線佬。」凱倫騎上馬。「咁又係嘅......」你騎上馬，「跟我嚟。」凱倫用韁繩策馬前進。你跟上凱倫，「啱啱喺間屋發生咩事？」

「對面都有嚟自未來嘅人。」凱倫說。「咩話？」「我嗰陣入到去，發現啲人攞住未來嘅武器，連啲叫聲都係未來嘅工具整出嚟。仲有格利得林拎住嘅嗰個白色盒，一定都係未來人畀佢。」

「再者，呢兩日發生嘅事根本就同原本嘅完全唔同。」「咁原本嘅係點？」「呢個世界根本就冇.....我唔可以再講落去，再畀你知多啲就返唔到轉頭。總之你打你嘅仗，未來人我哋會搞，都一定唔好同其他人講你啱啱見到嘅未來產物。」「好，我唔會。」

「點解到依家，一個人都見唔到？」你看着旁邊的樹木，「依度一早就畀人列咗做禁區。應該係因為十五年前嘅嗰場爆炸......！」凱倫吸了一口氣。「做咩？」你問。「冇事，冇事。」凱倫繼續望着前方。





「係喇，妳知唔知道點解我會識一啲我之前完全未見過嘅嘢？」你問。「例如呢？」「一樣叫「鍋爐」嘅嘢，同埋英文。」

凱倫低下頭念念有詞後說，「吓？我唔知喎。」雖然你覺得她一定有所隱瞞，但你也決定不再追問，「咁好啦。」

「凱倫，我想知多啲關於妳嘅嘢。」你說。「你問嚟都冇用，你只需要知道我同你係兩個世界嘅人，互不相干。」凱倫說。

凱倫一直擺着一副冷漠的臉孔，你也不想為她帶來更多的困擾，所以接下來你都沒有再和她說話。