你是一名在戰場上的無名士兵: 第5章EX2：未來的結晶 - 13 (EX完)
你望下斜坡，那是一個完全由冰組成的直路，如果滑下去可以讓人不斷加速，「我想問下，冰唔係要喺某一個溫度之下先可以形成嘅咩？咁即係山腳都係低過嗰個溫度？」你問海迪路絲。她望向山腳，「咁係因為呢度嘅溫度直接傳咗落最下面嘅冰，所以成嚿就可以維持冰態。」她在提出一個理論的樣子。
「咁我哋滑完落去要點停？」你看見山腳有一堆積雪。「就好似你見到咁，直接插入啲雪入面。」海迪路絲肯定地說。「好....」你有點膽怯。「唔使驚，好快就落到去，但一定要捉實嚿水晶。」海迪路絲用稍微堅實的眼神看着你。
「咁準備好，我哋就落去喇。」海迪路絲說。「三，」你吞下一口氣，「二，」你稍低下頭看着目的地，「一，」你踏出右腳，「零！」海迪路絲就像把你拉下去般，當她滑下去後，身為被燈火吸引的飛蛾，你馬上坐在冰面上朝山腳滑下去。
你從背後感受到屍體的冰冷，加上高速滑行的壓力，你感到坐立不安般的搔癢，「唔好郁！如果唔係嘅話我哋到目前為止做嘅所有嘢都會浪費！」海迪路絲望着前方，用命令的語氣說。或者是非常難得，但你的確接受到命令，穩定了身體。
你在滑坡上看不到任何障礙物，只有愈來愈近的積雪和兩側的雪林，你也沒有任何時間和力量去注意其他事情，你把所有意志力放在水晶上。「聽住，落到去嗰陣，我哋會好似畀人拋出去咁，一定要捉實嚿水晶！」海迪路絲已經重複了這一句千百次，但這就是你們來到這裏的理由。你快要撞上積雪了，與其說害怕，倒不如說是忍耐着成功的喜悅，
「噗」你們撞上積雪，你感到腦中有無數的火在燃燒，但火釋放出的不是暖意而是寒冷，寒冷把你的頭冰住了，你在天旋地轉，「唔可以放開...唔可以放開...」你在心中默念。
在吵鬧消失後，你躺在雪中，雙手放在前方捉着水晶，白雪包圍着你，你起來張開眼睛後，看見海迪路絲露出一個非常燦爛的笑容，「我哋得咗喇。」
海迪路絲喜極而泣，但馬上把眼淚抹掉，「要攞埋返去先叫完。」
你們向馬車的方向走去，雪落下來的樣子就像在祝福兩個互相扶持，出生入死的冒險者。
-------------------
「真係好多謝你！」海迪路絲在馬車坐在你的旁邊。外面墨綠色的樹彷彿也流露着謝意。「呢啲係我應該做嘅嘢。」你說。「你應該做嘅嘢唔止咁少。」「吓？」「我諗應該有人同你講過，有時候你都要諗下自己。」海迪路絲用手指點了點你的左胸。
「咁我可唔可以摸下妳個頭？」你看着海迪路絲雪剛融化黃澄澄的頭髮。「估唔到你第一時間諗到嘅竟然係啲咁嘅嘢...好啊！」海迪路絲冷淡地諷刺後用可愛的語氣說。「咁我...」你伸手撫摸海迪路絲的頭髮。「好滑...好軟...好暖...」你小聲地說出了自己的想法。
「你係咪變態嚟？」海迪路絲看着你把臉緊縮，像發情期動物的樣子。「冇。」你馬上把手放開。「雖然人喺講大話或者心虛嘅時候通常會冇諗過問題就係咁答，不過算啦。」海迪路絲露出微笑。
「你返到去想做咩？」海迪路絲問。「我想搵返雪倫先，然後再食返餐。」你說。「個答案好似同啱啱有啲唔同咁。」海迪路絲用稍高的聲調說。「邊度？」你問。「冇嘢，不過你一定有得食。」海迪路絲望向馬車外面。「點解你咁肯定？」你問。「你返到去咪知囉。」海迪路絲好像隱瞞着甚麼。
「咁到之前我想瞓先。」你說。「好啊，到咗我再叫醒你，早抖。」海迪路絲溫柔地說。你閉上眼睛，放鬆精神，入睡了。
「起身喇。」海迪路絲的聲音在你左邊傳來，你張開模糊的視線，馬車外面是安杜城的城門。「我哋返到喇？」你用如夢初睡的聲音說。「你哋可以入去喇。」你從左邊聽到門衛的聲音，馬車進入城內，另一輛載着貨物的馬車在門外接受門衛的檢查。
馬車駛往海迪路絲的店舖，橙紅的天空把地面染成薄薄的橙色，你看到店門前有十幾個人。「唔通...」你站在馬車邊緣，用右手扶着車廂，左手放在額頭前想看得更清楚。「係雪倫同啲護衛！」你向他們揮手。「好喇，係時候...」海迪路絲在即將到達時站起來。「係時候？」你轉過頭問。
「小姐，到咗喇，啲貨陣間都會嚟，咁我行先。」馬伕說。「我有畀啱錢㗎呵？」海迪路絲問。「梗係，我哋已經收到。」你和海迪路絲下車後馬伕便把馬車駛走了。
「巴奇！」在你下車後不足剎那，雪倫便衝過來把你抱緊。「好涷...」雪倫流着眼淚說。你的身體感到溫暖，雪倫的擁抱雖然清涼卻蘊含暖意，至少這裏比雪山上溫暖許多。「你走之前都同我講你去邊啊嘛！雖然我都知...」雪倫的眼淚把你那早已變乾的大衣沾濕。「妳知？」你望向站在原本馬車位置的海迪路絲。
「好喇，我哋係時候去食嘢。」海迪路絲指着護衛們。「係嘅，海迪路絲小姐。」護衛們向海迪路絲敬禮。「妳識佢哋？」你問。「你記唔記得雜貨店個老闆？我識佢，雖然唔係朋友嗰種，淨係識嗰種。」海迪路絲說。「跟住呢？」你震驚地問。「隊護衛其實跟咗佢好耐，之前我都同過佢哋一齊，所以佢哋識我。」海迪路絲說。「哦哦哦！」你裝成恍然大悟但其實很驚訝。
「所以，你買啲麵包畀咗我。」雪倫說。「咁啲麵包呢？」你問。「喺我哋陣間食嘢嗰間餐廳度。」其中一個壯碩的護衛說。「咁...我哋仲唔快啲行？」你的聲調由低轉高。「等陣先！我要擺返嚿水晶...」此時，載着貨物的馬車也到了。
在餐廳，你們訂了一張二十人的桌子。「咁...祝凱旋而歸！」你舉起酒杯。「喔！！！！！」雖然桌子大得令你們碰不了杯，但你們還是歡呼了。護衛們彷彿在說着甚麼，「巴奇，好多謝你，如果冇咗你，我可能喺上面死咗都冇人知。」海迪路絲雙手放在你的左手上。「邊係呢，妳上次都冇事，今次有我就咁多麻煩，我先要講對唔住。」你放開左手握着的酒杯。「邊係呢邊係呢，你幫咗我好多！」海迪路絲像一隻飢渴的野獸說。
「人哋要多謝你咪受咗佢囉。」雪倫在你右耳邊說。你看着海迪路絲真誠的眼神，「唔使客氣，咁妳諗住用嚿水晶整啲咩？」你問。「雖然我好想講，但呢個係祕密。」海迪路絲放開你的手說。「咁啊...咁各位，我哋再乾多次杯！」你說。「但係我哋啱啱先舉完咋喎大佬。」其中一位護衛說。「你就唔好咁多嗲啦，我哋一齊乾杯！」坐在那位護衛右邊比他威猛的護衛說。
「咁...祝...祝咩呢...」你站起來舉起杯子但想不出好句子。
「祝我又多咗樣嘢可以整！」海迪路絲衝了上來。「喔！！！！！」雖然仍然碰不到杯，但你們的氣勢非常高漲。
雖然冒險很艱辛，但在回來後吃到的麵包卻是最甜美的。
--------------
「其實呢...呢度啲嘢食全部都係我哋打獵攞返嚟，所以唔使錢。」雪倫在吃到一半時在你耳邊說。「吓？真係多謝晒。」你歎了一口氣，也許是因為謝意大得你不想溢出來。「唔使多謝，食晒佢啦！」雪倫露出笑容。你望向海迪路絲，她擺着一副肯定的臉龐並對你微笑。