你是一名在戰場上的無名士兵: 第5章EX2：未來的結晶 - 12

「咁我哋要點將佢搬落去？」你問。「同埋，點解我哋依家直接用手掂佢都冇事？」奇怪地，你的雙手只感覺到一點寒冷。「呢個問題好簡單，第一，我哋陣間出到去之前要戴手套，第二，依家冇事係因為佢啲寒氣畀其他水晶吸走咗。」你們放下水晶後，海迪路絲從袋子中拿出兩對手套。

「畀其他水晶吸走咗？」你產生極大的疑問。「呢啲水晶原本係一嚿嘢嚟，所以當其中一部分冇咗嘅時候，直到我哋離開依度之前，呢個水晶嘅寒氣都會用嚟補返唔見咗嘅地方。簡單啲嚟講，即係好似一個漩渦咁，水離佢好近嗰陣就會畀佢吸入去，但離遠啲就冇事。」海迪路絲把手套遞給你。

「陣間，一定要好小心好小心，絕對唔可以放開嚿水晶，如果唔係我哋又白行一趟。」海迪路絲把手套穿上。「嗚嗚嗚...」狼的叫聲從樓梯傳出來。「弊！我哋要快啲走！」你催促海迪路絲。「又好似係，我將啲狼打晒落去...」海迪路絲發出牽強的笑聲。


「唔怪之得我喺下面聽到佢哋啲聲！總之，我哋走先啦。」你和海迪路絲舉起水晶，水晶不是很大，就像一個胖胖的花瓶的大小，但相當重。你們慢慢走向出口，牆壁上也漸漸出現被雪吹過的痕跡。在光的另一邊也能聽到大雪紛飛的聲音。

「就嚟到喇！」你隱若看見外頭覆蓋了到膝蓋高的雪，「我哋陣間要行過去？」你問海迪路絲。「唔緊要！條路唔係好長，過咗就可以直接落山。」在右邊的海迪路絲右腳一步、左腳一步地走。





走到出口時，牆壁已經被染成白色，而水晶也比剛才冷了許多。「我哋行啦。」海迪路絲把你的注意力叫回來。

一走到外頭，你便覺得寸步難行。「如果當初呢到咁難行，妳當初係點返去？」你問海迪路絲。「就係因為咁難，當我行完，滑落去嗰陣唔小心整爛塊水晶，呢啲咪叫功虧一簣...」海迪路絲低下頭。「咁你想用嚿水晶嚟整啲乜？」你問。「呢個係祕密。」海迪路絲眨了眼。

大雪把你的頭髮吹得花白，海迪路絲的頭髮就像黃花海上停留了不少的白色蝴蝶般。「係喇，多謝你。」海迪路絲說。「我先要多謝你，你嘅工具救咗我。」你回應。「咁你返到去想做咩？」海迪路絲問。「應該係食餐好，瞓返覺。」你說。「嗯，我都幾肯定你一定會食到餐好嘅！」海迪路絲彷彿在暗示甚麼。

「講就咁講，我哋依家要落到去先。」你看着大雪，「呼呼」的風聲在你耳邊來回穿梭，但是，但雪觸碰到水晶時，雪便很快地消失了。「點解啲雪唔會整污糟嚿水晶？」你問。「如果成個嘢可以吸
寒氣，咁其中一個都可以吸，嚿水晶係吸咗啲雪嘅寒冷，所以啲雪先會唔見。」海迪路絲說。





「咁佢係吸熱定吸冷？」你問。「我唔係咁清楚....但佢會令周圍嘅空間變涷。」海迪路絲說。「原來係咁，唔知呢嚿嘢可以整到啲咩勁嘢出嚟。」你說。「我已經有個初步嘅構思，但整出嚟首先要將佢完整咁帶返去。」海迪路絲說。

你們繼續在大雪中前進，「個斜坡幾時先到？」你問。「好快就到。」海迪路絲說。「陣間喺馬車我都想瞓返陣。」你說。「我都想！」海迪路絲興奮地說。在左方，你看見一個只有少許積雪的地方。「係咪就係前面？」你把頭轉向那處。

雪似乎在那個地方便停下了，再往前走應該就是滑坡。「係啊。」海迪路絲說。「我哋落去嗰陣係咪要捉到好實？」你再使力搬着水晶。「當然。」海迪嗰絲說。「咁如果我哋轉錯方向，咪會直接跌死囉。」你假設滑坡兩側是空的。「冇錯。」海迪路絲說。你感到不安。

「不過，條坡好闊，所以唔使擔心。」海迪路絲好像看見你的表情。說着說着，你們便走出了積雪。你再次看見陽光，在天上有幾隻白鳥在飛翔。身體也變得和暖了。

「係久違嘅光啊！」你雖然很想伸懶腰，但你仍要把水晶送到馬車上。「好喇，我哋要行喇。」海迪路絲帶着你向滑坡的位置去。