女神老細係我女朋友: 第五十章

「你唔做老闆？」我有啲愕然。


「嗯。」景霖將個頭靠過嚟我嗰邊，我都識做咁攬住景霖。


「做咩無啦啦有咁嘅諗法嘅？」


「無啊，只係，我唔想因為份冇咗你。。。」景霖將佢個頭埋落被入面我個心口到，我感到佢語氣好似有啲唔開心。




「傻妹嚟嘅，你做我老細同有冇我係到有咩關係呢？」我揭開張被將個頭揼低望住佢講。


「媽咪佢話我做唔好我個位係因為同你一齊，話再繼續癡住你就唔俾我翻屋企，又話如果公司再差落去就唔俾我做。。。佢又攞你嚟同Edward比。。。」


「咁你覺得我點啊？」其實我有啲嬲景霖老母攞我同個Edward俾，但係係景霖面前我就唔鬧伯母啦，啱啱仲要搞到咁尷尬。




「你梗係好啦，你唔係覺得自己會差過佢啊。」景霖嘟起個嘴咁望住我，望住佢個樣加上佢咁讚我，我又忍唔住錫咗佢一啖。


「咁所以你想唔做老闆？」我拉翻個話題翻嚟。


「我都唔知啊，但係如果為咗做老闆e個位而冇咗你咁我寧願唔要啦。」




「但係你唔怕你生活唔同晒咩？你而家衣食無憂，又有大把錢洗。」我知道景霖由細到大都過開太子女生活，所以都擔心佢會後悔同唔習慣。


「咁我可以搵過份工㗎嗎，留係公司做低級啲都得㗎，又唔係話一定要做老闆。」景霖有時真係樂觀到成個細路女咁，我又唔好意思疾翻佢。


「但係你住嗰到點啊？你唔做老闆繼續同我一齊伯母咪唔俾你翻屋企囉？」我始終擔心景霖嘅生活。


「到時咪平平哋租間房住下先囉，我都有儲啲錢嘅，同到你一齊就咩都得啦。」係黑暗之中我見到景霖笑住兩眼碌碌咁望我，我聽到景霖為咗我放棄一切真係有啲感動，忍唔住有啲眼濕濕。


「做咩喊啊？」景霖伸個頭埋嚟望住我，用手幫我輕輕抺走啲眼淚。




「冇啊，只係。。。。」我忍唔住攬實景霖。


「做咩啊？」景霖俾我突如其來嘅攬嚇親。


「我應承你，我一定會照顧好你。」e句大概係我成世仔講過最重責任嘅一句說話。


「阿明。。。」景霖係我懷入面臼高個頭望住我。


「對唔住啊，嚇親你。。。都夜啦，我地瞓啦。」我慢慢放開景霖，轉翻平個人。




「冇問題啊，早抖。」景霖起身錫咗我一啖之後瞓低橋住我隻手瞓覺。


「早抖。」我錫咗景霖額頭一下。