女神老細係我女朋友: 第五十一章

「起，身，啦。」我隱約聽到我隔離有人叫我，我慢慢擘大對眼，望到景霖貼近我塊面到叫我起身。


唔知點解，只要同親景霖一齊瞓覺就一定會瞓得好淰，有時甚至鬧鐘都叫唔醒我，不過我當然寧願俾景霖叫醒我好過個鬧鐘。


見景霖烘到咁埋，我忍唔住攬佢落嚟我身上面，一壓落嚟，完全感受到景霖心口壓落嚟嘅感覺，搞到我人都未清醒，小志明就完全起咗身。


「啊！做咩啊，遲到啦再唔起身。」景霖喺我身上面講，雖然佢口講話遲到，但係都下意識咁攬住翻我。






「俾我攬多陣啦。」唔知係咪因為未瞓醒嘅原故，加上尋晚同景霖嘅對話，我少有咁同景霖扭計，同埋攬住景霖聞住佢陣體香真係好正。


「今晚放工俾你攬過夠啦，而家要起身㗎啦。」景霖示意我放手，我睇一睇牆上個鐘，時候真係唔早，唯有唔情願咁放手。


「乖啦。」景霖起身前錫咗我一啖，少有地，我竟會係佢面前表現出咁嘅一面，話晒平時都係景霖扭我計。






「咦，伯母呢？」


「阿媽佢應該又係去同阿爸飲早茶。」我望一望阿媽間房見佢地唔係到。


「嚟啦去刷牙洗面啦。」我搭住景霖膊頭同佢入廁所，係櫃到攞咗支新嘅牙刷俾佢。






屋企廁所唔大，所以我同景霖就前後企咗係個洗手盤到咁望住塊鏡刷牙，個畫面就好似兩兄妹咁樣。


刷完牙後我順手攞咗條毛巾幫自己同景霖洗埋面。


「唉呀，邊有人咁大力抹面㗎。」景霖搶過我條毛巾，擰過身埋嚟同我抹多次面。


「咁樣抹先乾淨㗎嗎。」景霖一跟幫我抹面一路同我講。


「咁大，力，啲先可以，抹乾淨啲污糟野㗎，嗎。」我俾景霖抹到講野一舊舊，景霖冇應到我，只係無奈咁望住我，我就瞪大對眼望住佢，佢好似唔係好接受我e個理由。






翻出去，睇一睇時間，都已經差唔多遲到啦，e個時候，全叔打俾我，原來啱啱佢見景霖唔係屋企，又冇聽電話，咪估景霖過咗嚟我屋企過夜，特登嚟我樓下接我地一齊翻工，所以我同景霖都好快手咁搞掂啲嘢落去。


「早晨啊全叔，又麻煩你，唔好意思。」我上車同全叔打招呼。


「唔麻煩，乜而家輪到景霖去埋你到住啊。」


「尋晚，有啲事，所以先嚟咗我到。」我有啲怕醜。


「冇嘢喎，全叔都係多口問下姐。」






『景霖嚟我到住？』全叔嗰句令我不禁萌生e個念頭。