女神老細係我女朋友: 第四十九章

「冇野啊，係啦阿明同你講咗啲咩？」


「咪佢啱啱點樣係你屋企到大聲鬧你阿媽幫你出氣囉。」


「吓，阿媽你唔覺得阿明咁做唔好冇禮貌咩？」我有啲驚訝伯母竟然冇鬧到阿明，調轉係媽咪一定鬧到我反轉。


「點解你兩個問埋啲問題一樣㗎。點會呢，咁個衰仔佢係真心為咗你先夠膽咁㗎咋，如果唔係佢邊夠膽出聲啊，由細到大啊阿明都成隻鵪鶉咁㗎，大聲講兩句都怕醜嘅。」






「阿明佢。。。」我聽到有啲眼濕濕，竟然為咗我咁。。。


「阿女你聽阿媽我講啦，我知道你同你阿媽關係唔係幾好，翻工又有啲壓力，唔梗要㗎，慢慢嚟啦，你咪當住我係你阿媽咁先囉，總之我就當你半粒女咁㗎啦。」伯母佢搭住我膊頭咁樣同我講，我從來冇聽過自己媽咪會講啲咁暖心嘅說話。


「阿媽。。。」我忍唔住流哽咽，眼淚都流梗出嚟。






「唉呀，傻女嚟嘅，喊咩呢，小小事咋嗎，唔洗喊。」伯母佢一路講，一路抽咗幾張紙巾出嚟幫我抹眼淚。


其實我由細到大對屋企人e個概念都好模糊，記得細個爹d真係好錫我，無論公司幾忙都會翻嚟陪我，帶我出街玩，甚至帶我翻公司，媽咪就好似掛住做嘢咁，冇乜點理我，到我識性啲，爹d就開始病，我就不停咁俾爹d灌輸我要點樣帶好間公司之類咁樣，真係冇乜屋企人嘅記憶，而家阿明同伯母咁樣對我一個外人，我真係冇諗過原來有屋企人係e種感覺。


我想同屋企人再親近啲，真係好想。






———————————————————————張志明


我一路抹頭一路諗，唔知阿氹成景霖點呢？我特登沖耐啲俾啲時間佢地兩。我抹乾身之後就迫不及待咁出去睇下。


「阿媽？景霖做咩眼濕濕嘅？」我一出去就見到阿媽係到幫景霖抺眼淚，睇嚟阿媽氹到景霖感動到喊。


「唉，景霖佢感性啊嗎，喊下好正常姐係咪？」阿媽望完我之後就望翻景霖答我，景霖都望住我嗯咗聲。


「吓？」我聽到側晒頭。






「唔講啦，都夜啦，快啲帶景霖入房瞓啦，唔係聽日翻工冇精神啊。」阿媽扶景霖起身同時對我地兩個講。


我帶景霖上床，我張床冇景霖屋企咁大張，所以我地兩個痴得好埋，同一張被下，我隱約感受到景霖嘅體溫。


「啱啱阿媽同你講過啲咩？」


「冇啊，hehe。」景霖好似細路女收埋秘密咁樣偷笑我。


「快啲講啊。」我轉過身過去攬住景霖扮到好似質問佢咁。






「唔講喎。」景霖都拎轉咗個身埋嚟望住我，我地塊面只有幾厘米之差。


「我想知啊嗎，快啲。。。mmmmm」我把口俾景霖突如其來嘅一吻堵住咗。


「講完啦。」我隱約係黑暗中見到景霖係到笑梗我，我扮出一個無奈嘅表情俾佢。


「阿明啊，如果我唔做老闆你點睇啊？」景霖望住我問，雙眼係黑暗中透出微微嘅反光。