女神老細係我女朋友: 第四十八章

「阿媽，翻嚟啦，景霖都嚟咗。」我入門口同阿媽講聲。


「唔好意思啊阿媽，我又嚟打攪你啦。」景霖隨住我入屋之後同阿媽打招呼。


「咦？做咩景霖係到嘅？阿仔你唔係送人翻屋企咩？」阿媽坐係梳化到問我。


「景霖佢有啲事所以今晚係到過夜啊。」我幫景霖解釋。




「哦，咁好啦，我入去攞條毛巾同啲衫俾景霖你啦，當自己屋企得㗎啦景霖。」阿媽都冇過問太多，隨即起身入房攞嚟。


「係喎，世伯呢阿明？我上嚟咁多次都唔見佢？乜咁夜都唔翻屋企嘅？」我帶景霖係梳化坐低之後，景霖就捉住我隻手問我。


「阿爸佢翻凌晨更啊，所以平時朝早先翻屋企㗎。係喎，講起阿爸都未見過你。」景霖唔提起我都唔記得咗佢地兩仲未見過面。




「嚟啦景霖，去沖涼先啦熱水得㗎啦。」阿媽攞住條新嘅毛巾同啲唔知邊度搵嘅睡衣褲係房到行出嚟俾景霖。


「哦阿媽。」景霖清脆咁回答之後就起身入咗廁所。


「發生咩事呀阿仔？做咩景霖無端端翻唔到屋企嘅，唔係有咩事啊嗎？」阿媽見景霖入咗廁所之後就坐低係梳化問我。




「其實係因為伯母佢係景霖屋企。。。」


「吓？咁就唔翻得屋企？」


「唔係啊，因為啱啱.......」我將啱啱係景霖屋企我大聲鬧伯母嘅事同阿媽講，除咗景霖係我老細之外。。。


「我咁做係咪。。。好冇禮貌啊？」我講完之後都有啲慚愧同阿媽講出嚟。



「枉我冇生錯你喎，叻仔。唔使驚喎，阿媽撐你，我覺得你唔係冇禮貌喎，你係幫景霖出啖氣啊嗎。一陣呢你去沖涼等我嚟同景霖講。」我估唔到阿媽竟然冇鬧我，平時佢都教開我對人要有禮貌，我鬧得伯母咁甘都估唔到佢話我冇錯，都啊知係佢錫景霖定係點。




講完之後景霖都沖完涼出嚟，佢著件我都唔知阿媽係邊到搵出嚟嘅tee同條短褲出嚟，睇落同係自己屋企嗰陣就好似兩個人咁，不過都係咁靚。



「阿仔你去沖涼先啦。」阿媽單一單我眼示意佢嚟氹一氹景霖，我都識做咁樣走入廁所，因為有啲事我男朋友嘅身份真係俾唔到景霖。

———————————————————————-
黃景霖


「嚟坐低。」伯母拍拍張梳化示意我坐低係佢隔離，我就抺住頭咁過去坐低。


「啱啱呢，阿明同我講晒發生咩事啦。」




「吓，阿明佢。。。。」


「佢有冇講埋我係佢。。。」我驚伯母知道我係阿明老細。


「講埋你係咩啊？」睇嚟伯母仲未知，我隨即鬆口氣。