女神老細係我女朋友: 第四十七章

「！」伯母俾我突如其來嘅一句嚇咗一嚇，景霖都有啲不可置信咁望住我。


「其實！景霖係咩身份我真係唔在乎，無論佢係我公司老闆，定話係我公司洗廁所，有冇錢，有冇司機，我都係當佢我女朋友咁鍚佢。」我捉實景霖隻手，望住伯母講，但係可能我自己都十分緊張，講嘢都冇乜條理。


「伯母我冇唔尊重你嘅意思，但係景霖想要啲咩你有冇在意過？景霖20歲書都未讀完就要接手一間咁大嘅公司，我明白係世伯嘅遺願，但係你作為佢阿媽，唔單止冇係嗰個時候支持佢，而係走去美國，到佢識錯咗個Edward先翻嚟鬧景霖，你又覺得自己冇責任咩？而家公司業績跌，你覺得景霖想？佢有幾大壓力你知唔知？而家一見到你自己個女唔係安慰鼓勵佢，而係質問佢，你點做人阿媽？」我一股作氣咁樣講晒我嘅睇法阻嚟，但係我自己都心跳加速，係對住一個自己唔敢大聲講嘢嘅人大聲講嘢時嗰種嘅緊張。


「總之景霖我係唔會放棄，我唔會理公司嘅人知道咗會點，形象有咩影響，就算景霖唔再係老闆，我都唔會變。」其實我知道我咁樣講好似好幼稚，但係我已經頭昏腦脹。






「阿明。。。」景霖望住我，好似有啲唔相信我啱啱講嘅嘢咁，眼濕濕咁望住我，隻手捉得仲實。


「你。。。」伯母都俾我講到口擘擘唔知點應。


「對，對唔住大聲咗，唔阻伯母你。」我冷靜落嚟之後發覺自己唔敢面對伯母，為免個場面變得更加尷尬，我拖住景霖轉身行出門口入𨋢。






「啱啱。。。對唔住啊，咁大聲同你媽咪講野。。。」我係𨋢到同景霖講，個腦都慢慢咁冷靜落嚟。


「阿明。啱啱多謝你。」景霖冇應到我，只係撲過嚟攬住我。


「做，做咩啊？」我有啲愕然。






「冇啊，只係。。。我愛你，hehe。」景霖眼濕濕咁由下而上咁望住我，而我就繼續唔知咩事咁望住景霖。


「我地而家去邊啊咁？我諗今晚我都翻唔到屋企啦你啱啱咁樣同媽咪講野。。。」落到樓下景霖問我。

「其實我啱啱冇諗過咁多。。。唯有翻我屋企過一晚夜啦。。。」我其實都係冷靜落嚟先諗過我攪到連景霖都翻唔到屋企。


「好啊，行啦。」但係景霖都好似當咩事都冇發生咁拖住我隻手向我屋企方向行去，唔知點解佢好似好開心咁。