女神老細係我女朋友: 第四十四章

入到糖水舖，驟眼一睇，鋪頭裝修都幾新，睇嚟應該係啱啱開咗冇幾耐嘅新鋪。


「哥哥仔帶女朋友食糖水啊？兩位係咪啊？」應該係糖水舖嘅老闆娘係廚房用毛巾抹住手咁樣行出嚟。


「係啊唔該。」我拖住景霖應老闆娘。


同景霖坐低咗之後就拎起餐牌睇下食咩。






「想食咩啊？」我遞個餐牌俾景霖問佢。


「mmmmm.....我要食凍嘅腐竹糖水。」我有啲愕然景霖竟然揀啲傳統糖水都唔揀啲咩香蕉船啊嗰類。


「咁我要個芒果西米露啦。」反而我對傳統糖水冇乜興趣。






「老闆娘唔該。」我見到老闆娘喺度同第二台客傾緊計我就揮手叫佢埋嚟。


「係，嚟梗。」


「唔該要個芒果西米露同腐竹糖水，凍嘅。」






「係嘅，好快到啊吓。」老闆娘爽快咁應我。


坐低咗之後睇一睇間糖水鋪，除咗我同景霖之外都係得另一枱客，同我哋一樣都係pair情侶，睇落有啲眼熟，不過佢地睇唔到我同景霖，應該都唔識，我仲聽到個女仔係咁好大聲咁強調佢男朋友係佢「男！朋！友！」搞到我都櫈佢男朋友有啲唔好意思。


「凍腐竹糖水芒果西米露到，慢慢食啦兩位。」老闆娘好快就係廚房捧住兩碗糖水行出嚟放喺我地枱。



「唉啊，姐姐仔做咩隻眼好似紅紅地咁㗎？」老闆娘留意到佢景霖啱啱流過眼淚嚟，哇真係好眼力。


「冇事啊我，糖水好好味啊，老闆娘，hehe。」景霖即刻飲咗啖腐竹糖水。






「冇事就最好啦，唔阻你地啦。」老闆娘講完繼續過去招呼另外一枱客。


「我要食芒果，aaaaaaaaa。」景霖突然遞個頭埋嚟我到擘大個口。


我係我碗西米露度畢左兩舊芒果俾景霖食，食完之後景霖好似食咗粒糖嘅細路女咁笑，見到景霖笑翻我都欣慰咁笑咗出嚟。


「傻妹。」我笑住咁同景霖講。


「你就傻，哼！」景霖又再次嘟起個嘴。






「我都傻啦咁。」我畢多舊芒果擺係佢面前。


「你傻啲。」景霖一口食咗舊芒果。


「係啦，我傻啲啦。」


有時覺得，景霖真係好易氹，佢為我變咗咁多，其實我又可以為佢做啲咩？我係公司佢又幫我，又成日上嚟氹我阿媽開心，我可以為佢做嘅只係帶佢食糖水，我真係希望我作為男朋友做到更多，多到佢唔需要再為任何野而唔開心。。。