女神老細係我女朋友: 第四十三章

「景霖，不如落樓下行下消化下囉？」食完飯後阿媽就入咗廚房洗野，我就諗住同景霖行下，順便俾個機會佢訴下苦。


「阿媽，我同景霖落一落去行吓啊。」我同阿媽講聲之後就同景霖出咗門口。


「哇，啱啱食到好飽啊，阿媽真係煮好多野喎今晚。」我拖住景霖，一路行一路講。


「係啊，我都好飽。。。」景霖聽落仲好似好唔開心咁。






「做咩啊，成個人咁沉嘅。係咪今日係公司發生咩事呀？」我見景霖好似唔肯講咁，就主動帶入話題。


「阿明你唔係因為我嘅身份先同我一齊㗎可。。。」景霖突然細細聲咁問我。


「你身份？你話因為你係我老闆先同你一齊？」






「嗯。。。」景霖好似有啲唔好意思問咗我條咁嘅問題。


「點會呢，我同你一齊係因為你就係你，冇其他原因。」我望住景霖同佢講。


「咁.......咁如果我.....唔再係你老闆呢......」景霖dup低頭咁問我。






「我，張志明，淨係會愛黃景霖一個，唔關你咩身份，有冇錢，有冇病乜鬼野，我都唔會變。」我搭住景霖個膊頭同佢講。


「我驚我之後可能唔再係......老闆。。。」景霖講完e句開始有啲眼濕濕。


「點解？」景霖終於肯講咩事。


「今日幾個董事話我帶住間公司好似比以前差咗，想話調我落嚟。。。」


「調你落嚟？」






「因為我地公司一次過冇咗幾個客，搞到業績跌咗好多，佢地話再係咁我就要走。。。。」


「點會啊，咁係啲客問題姐，關你咩事。」我急忙係景霖身上轉移責任。


「其實......我都覺得自己好似做差咗。。。」但係景霖都係仲怪梗自己咁。


「傻妹嚟嘅，小小事咋嗎，唔好咁在意班老野講咩啦。」我輕輕抹乾景霖嘅眼淚。


「我唔想因為我搞到爹d留俾我間公司咁啊。。。」景霖突然攬住我同我講。






「慢慢做翻好咪得囉，有我幫你㗎嗎，我講過無論咩事都係你身邊㗎嗎？」我摸住景霖個頭安慰佢。


其實一個廿五歲女仔，要管一間跨國嘅大公司，係幾咁困難嘅事，我有時都唔明世伯點解會留間公司俾景霖管，學全叔話齋，景霖一啲都唔似一個廿五歲嘅後生女。不過雖然我口講說話好聽，我都唔知點樣先幫到景霖，我都只係個打工仔。



『不過如果景霖可以唔洗再做老闆，可能佢會過得開心啲？』e個念頭係我腦中一閃而過。


「我地過去食碗糖水囉？」行下行下，唔覺唔覺都行離咗屋企一段距離，我睇到對面街有間糖水舖，就提議同景霖食碗糖水等佢開心翻啲。


「好啊。」我拖住景霖過對面馬路。終於見到景霖笑翻，希望食完佢冇咁唔開心啦。