女神老細係我女朋友: 第三十九章

啊！屌！」我幫景霖用手擋開咗架單車之後睇一睇隻手，成忽擦損晒流梗血，搞到我都不敢屌咗聲。


「阿明，你冇事啊嗎！」景霖即刻捉住我隻手檢查我手上個傷口。



「損咗一大笪啊，好多血啊，點，點算啊？」景霖嚇到語無倫次，捉住我隻手，我甚至感覺到佢有啲手震。






「冇事嘅。。。」我見到俾我擋開咗嗰個男人原來都仆低咗，就埋去扶佢。


「你冇事啊嗎？」


「唔好意思啊，啱啱俾舊石kick親先失平衡撞埋嚟㗎咋。」俾我撞到嗰個起翻身之後同我道歉。


「有冇搞錯，唔識踩唔好亂咁踩啦！你而家撞到我男朋友隻手流晒血，你叫佢點算，吓！有咩係咪你陪錢？我男朋友隻手好值錢㗎，你......」景霖突然變咗老細嘅語氣係咁鬧嗰個人。






「景霖，夠啦。」我叫停景霖唔好再鬧嗰個人。


「唔好意思啊，我女朋友有啲緊張我，下次小心啲啦。」


「真係好對唔住啊，我洗唔洗幫你call白車啊？」個男人係咁道歉。






「唔洗啦，皮外傷啾姐，唔阻你啦。」我拖景霖坐翻埋去張櫈到，攞張紙巾出嚟印乾啲血，廢事佢又再鬧佢。



「啱啱嗰個有冇搞錯啊咁樣撞埋嚟都有。」景霖一坐低，又鬧佢。



「算啦，人哋都係唔小心姐何況我都冇乜事。」


「咩冇事啊，你啱啱......啱啱幫我擋咗成架單車.....你流咁多血......會唔會.....會唔會殘廢㗎。。。」景霖望住我個傷口對眼開始濕濕地，好似想喊咁樣。






「傻嘅，小小傷咋嗎，點會殘廢咁嚴重呢。」景霖有時講啲嘢成個細路女嘩，真係搞到我笑又唔係喊又唔係，我都唔知點好。


「人地咁關心........你仲要.......仲要話我係傻嘅。。。。」景霖真係開始喊，我即刻攬住佢。


「唉啊，你最聰明啦。你睇吓冇野喎，小小血咋嗎，冇事喎，傻妹嚟嘅。」雖然真係幾多血。


「你又話......又話我傻啦。。。嗚。。。」景霖攞個頭撞落嚟同我講。


「係嘅係嘅，你最醒目。」真係唔明係我受傷定係佢受傷，仲要我安慰翻佢，不過為咗景霖，乜都值得啦。