女神老細係我女朋友: 第三十三章

我追到出去，係餐廳門口捉住景霖隻手，截停咗佢。


「做咩啊？」景霖好嬲咁講，但係我知道佢唔係真心嬲我，只係聽到班舊同學講完啲嘢唔開心，因為佢一截就停，都冇試過fing開我隻手，加上翻屋企餵貓e啲咁嘅借口，真係得景霖咁天真先諗得出。


「你聽我講先啦，景霖，Sandy有男朋友㗎啦，同埋都咁多年前囉。」我安慰住景霖咁講。


「點知，點知佢特登搵翻你係咪想溝你㗎。」景霖嘟起個嘴望住我咁講。






「我同你發誓，如果有第二個想溝我我會立刻拒絕，我講過淨係會同你一齊照顧你㗎嗎。」我雙手捉住景霖塊面同佢講。


「哼，撞死你。」景霖鼓起塊面用個頭撞落我心口到。


「哎呀好痛啊。」我配合景霖個頭搥，扮到好痛咁，然後攬住佢，我自己講完都有啲唔好意思，不過為咗佢，乜都得啦。






「嚟啦，我地翻入去講聲然後走啦好冇？」


「嗯。」景霖點咗下頭。


「啱啱唔好意思，我地走先啦，拜拜。」我係張櫈到拎翻條衫同個袋，然後拖住景霖起步離開餐廳。






「對唔住啊Christy，佢地應該係飲大咗㗎咋。」Sandy同佢男朋友阿Rain出嚟同我地道歉。


「唔洗，不過下次咩中同聚會真係咪搞我，拜拜。」我用淡淡嘅語氣代景霖應Sandy ，之後拖住景霖走。


我聽到景霖係聽到我應Sandy嗰陣偷笑咗一聲，然後橋實我。


出到去我想打電話叫全叔過嚟車我地，但係景霖叫停咗我。


「做咩？」






「我想去附近公園坐下.....可以一齊耐啲啊嗎。。。」景霖有啲怕醜咁講。


「哦，冇問題啊。」我摸一摸景霖塊面然後拖住景霖行去公園。


去到公園，見到唔係太多人，我地就諗住搵張櫈坐低咗，今晚咁啱月亮出咗嚟。



見到隔離長櫈都有對情侶坐埋咗一齊咗，個女仔個頭瞓咗係個男仔嘅膊頭，就咁睇個女仔都幾靚，後生過我同景霖，睇落應該都係姊弟戀。



行過佢地嗰陣聽到個女仔問「細佬啊，你而家有冇鍾意嘅人啊？」乜而家啲家姐會想溝自己細佬㗎咩？不過唔講我都唔知佢地係姊弟，因為真係幾襯，完全睇唔出係姊弟。







「喂你聽唔聽到啱啱呢嗰對姊弟成對情侶咁啊。」我係景霖耳邊細細聲咁講。


「你唔好理人咁多啦。」景霖皺一皺眉頭叫我唔好講。


「哦。」


我地揀咗一張附近冇乜人嘅長櫈坐低咗，依偎住大家一齊睇住個月亮。






「啱啱對唔住啊，我諗住帶你出嚟食下飯咋，冇諗過會咁㗎。」我同景霖道歉。


「哼，我未嬲完啊。」景霖扮出個好嬲個樣由下而上咁望住我，不過景霖e刻真係好得意。


「咁咁樣會唔會冇咁嬲。」講完之後我錫咗景霖嘟咗嘅嘴，因為真係忍唔住。


「算你啦。」景霖好似個俾粒糖氹翻嘅細路女咁，佢e刻笑得好甜，搞到我忍唔住錫多啖佢。


我同景霖就咁坐咗係公園成晚，而e晚係我覺得人生其中一段最幸福嘅時刻。