女神老細係我女朋友: 第二十一章
今日放工又係同尋日一樣，老細早一個鐘一陣風咁離開咗公司。
放工後細強叫我去食飯，但係而家搞到咁，仲邊有心情同佢食飯啊，所以推咗佢，諗住翻屋企淥個麵加啲剩菜食算。
翻屋企嘅途中我一路望住老細個what’s app，希望老細可以覆我，但係直到我落咗車差唔多翻到屋企樓下，部電話都係冇響過，而老細what’s app嘅頁面都係停留係我最後嘅message。
「覆下我啦老細，我真係冇心㗎，唉。」我一邊行一邊望住icon嘅蠟筆小新自言自語。
正當我差個彎就翻到屋企嘅時候，我見到全叔架車泊咗喺對面街。
『全叔？』
我行過去全叔架車到，行近駕駛座，見到全叔就坐咗係入面開住窗食煙。
「全叔。」我同全叔打咗聲招呼。
「喂明仔，上車先講啦，嚟。」全叔打開咗副驚駛座道門叫我上車。
「全叔你仲咩係到嘅？」我一路上車一路問。
「咪嚟搵你囉，啱啱車完景霖翻去咪特登過嚟等你囉。」
「搵我？有咩事搵我啊？」
「你個衰仔啊，仲扮嘢，尋日開始我就見景霖黑晒口面咁，又早成個鐘叫我接佢，我估九成九都係你條衰仔做過啲咩嚟搞到景霖咁啦，你好清清楚楚咁講俾我聽囉喎，靚仔。」全叔吐出一口煙。
「吓，唔係卦，我都係.....」我一五一十咁同全叔講晒由嗰晚同老細食飯見客嘅過程俾全叔聽。
「你條衰仔啊，嗰晚阿全叔我特登同話搵我個女去撐枱腳唔接你哋係俾機會你啊傻仔，咁都唔識做？」全叔一掌拍落我個頭到。
「唉啊！吓，咁姐係.....你個女唔係嗰日生日？」
「唉，你條白癡仔真係啊，全叔用心良苦做個機會俾你地，我仲見景霖特登翻去用自己部電話加你聯絡人，仲俾佢叫我幫佢卜枱想聽日禮拜六請你食餐飯多謝你，我都好耐冇見過景霖對人咁好啊。」
我越聽全叔講越慚愧，直頭想跳落出面個垃圾桶算。
「我識咗景霖咁耐啊，景霖都冇乜用過私人電話聯絡我，你翻工幾日景霖就俾咗佢私人電話號碼你，仲擔心你翻屋企危險。你條衰仔仲要講埋啲咁嘅野，而家搞到景霖咁唔開心，真係唔知可以點話你，全叔我真係唔一掌劈死你都對唔住自己同景霖。」
「咁我講嗰陣冇諗過老細佢會聽到，都係諗住呻下。。。。」
「啊你個衰仔仲講下話，呻你個死人頭啊，你都唔識死啊，我理得你係咪講俾景霖聽，總之而家景霖因為你唔開心！」全叔又一掌拍落我個頭到。
「吓，我真係冇諗過原來老細佢......咁而家點算好啊全叔....」我e個時候訃諗翻起阿Sam話老細幫我講嘅好說話，真係就慚愧到縮埋一嚿。
「你話呢，我啱啱就車咗景霖翻屋企，你覺得要點做啦？」
「開車啊全叔，麻煩你車我去老細屋企。」我堅定咁同全叔講然後扣好安全帶。
「坐好啦明仔。」全叔輕輕一笑，將煙頭㩒落車上嘅煙灰缸整熄，發動七人車引擎。