女神老細係我女朋友: 第二十章
我一見到老細嚇到即刻一腳踢開細強張櫈翻去個位然係擰翻埋張枱扮做嘢，e刻就好似俾細個俾老母捉到咁驚。
擰轉頭嘅只係聽見老細嘅閂門聲，然後聽到佢入到房拉埋咗我背後玻璃嘅百葉窗。
「哇，完全估到你嗰腳，差啲俾你踢落張櫈。」細強見老細翻咗入房，就慢慢過翻嚟。
「屌你啊，唔一早同我講老細係我後面！啱啱講嘅嘢俾佢聽到晒。」我同細強細細聲咁講，驚老細聽到。
「俾晒提示打晒眼色啦喎，係你條白癡仔自己唔get咋嗎，仲有啊，我見到老細好似有啲眼濕濕咁。」細強同我解釋，唉不過打乜眼色都冇用啦，而家都唔知點同老細解釋。
「唉，算啦都唔關你事。」我都冇乜心情同細強講落去，繼續做野算，希望老細唔係太在意啦，細強仲話佢啱啱眼濕濕，唔會因為我而喊掛？
「喂阿明，你尋日份proposal講解得唔錯，老細同我講你做得幾好，叫我照住你。唔錯啊，第二日翻工就有咁嘅表現，仲有老細幫你講嘢，繼續努力啊吓。」食完lunch之後阿Sam突然行過過嚟我張枱度，放低咗我份proposal嘅copy，打開佢，入面有老細寫低嘅幾句讚我proposal寫得好嘅評語。
老細話我做得好？我尋晚係恰住眼瞓咁講㗎喎，我都唔覺自己講得好，唔通係老細佢特登為我講好說話？
突然之間我覺得好慚愧，啱啱講埋啲咁嘅嘢。。。
我起身走去老細房門，雖然我唔擅長道歉，但係在公在私點都要同老細講翻句對唔住嘅。
「老....闆？」我敲門問老細。
入面冇回應。
「頭先對唔住啊，我，我冇心咁講㗎，只係太攰先。。。」
入面都係冇回應。
我唯有暫時放棄，等放工嗰陣先再同老細講。
但係放工嗰陣，老細早咗放工成個鐘係我後面開門然後一陣風咁樣走咗出公司，我連截停佢嘅機會都冇，但係離放工時間都未到，我追出去會俾人當早退。
放工後，我鼓起勇氣what’s app老細。
（我:老闆，今日朝早對唔住
我唔係有心咁講㗎。）但係老細都係冇應到，直到我翻屋企都係冇應到，就係咁我等到瞓覺。
第二朝我特登早二十分鐘翻到公司希望撞到老細，我問大堂保安老細翻咗未，原來老細已經早我10分鐘翻到。
我上到公司，見到老細房依然係閂埋咗百葉窗，我敲門都係唔應。
「喂點啊，氹點老細未啊？」細強食住佢早餐塊多士問我。
「唉e兩日見都未見到佢，點氹。」
「唉無野嘅，你坐佢房前，點都有機會嘅。」
可惜嘅係，今日除咗有幾個經理入過老細房，佢道房門都冇開過咁濟，連老細個影都見唔到，莫講話道歉啦。
我就係咁心吊吊咗老細成日到放工。