女神老細係我女朋友: 第十九章
「？」我擰轉頭望住老細。
『唔會係又叫我上你屋企吓話，我兩日冇翻屋企咁濟啦。』
正當又擔心又有些少期待老細請我上佢屋企嘅時候，老細攞咗部電話出嚟解鎖遞俾我。
「俾你電話我...」老細好似有啲怕醜，但係聽得出佢強裝出平時嘅語氣。
「電話？吓，哦.....係。」我有啲突然老細要我電話。
我接過老細部電話，打俾自己一次，係老細同自己部電話到記得咗大家個電話號碼。
「做咩，無啦啦....要我電話嘅？」我輕聲問老細。
「而家夜晚....係街危險啊嗎.....所以你翻到去同我講聲。」老細有啲口窒窒咁講。
「你......擔心我？」其實我聽到老細咁講我有啲開心，不過我一方面想盡力掩飾我e家嘅心情，一方面真係太攰。
「得鬼閑擔心你咩......唔想你因為見完個客第二日唔見咗咋。。。」
「哦。。。明白。」我都唔知點應老細，唯有答佢句明白。
「咁我走先啦，早抖。」我第二次同老細道別。
「拜拜。」老細講完就轉頭入咗大堂，我都開始行翻屋企。
我拎出耳機戴上，打開手機播起歌嚟。
望住手機上老細嘅電話，我將老細set咗做景霖•老細。我不停思考著啱啱老細要我電話嘅情景，我都知今時今日夜媽媽係街好危險，但係又會咁突然問我攞電話嘅？不過唔理點都好，我都好開心而家終於有老細電話，不過冇諗過係老細主動問我攞姐。
聽住歌諗野，冇幾耐就行到翻屋企樓下，入到去好快就有𨋢翻到屋企。
我打開電話what’s app老細，老細個icon係蠟筆小新嘅公仔，唔加佢電話，真係估唔出係我間公司嘅老闆嚟。
我:老闆，我安全翻到去啦。
見老細未應我，我趁e個時候去沖涼，沖完涼出嚟就見到老細覆咗我。
老細:係到唔洗叫我老闆，叫我個名得。
我:知道。
老細:好，咁早抖啦，都夜啦。
我:早抖。
其實我感覺老細有啲奇怪，點解係公司對住我同埋私底下對住我個反差可以咁大，成日感覺就好似兩個人咁，都唔知淨係我啊定係點，一時又好強勢，一時又好怕醜，我有時都唔知俾咩反應。
e兩日都未瞓過覺好嘅，覆完老細一瞓上床就瞓著咗，特登較遲20分鐘鬧鐘俾自己瞓多陣，廢事翻到公司冇精神，第二朝先俾鬧鐘噪醒。
翻到公司，細強又過嚟問我尋晚發生咩事。
「點啊，同老細撐枱腳搞成？」
「撐條毛啊，對住個客講咗成晚野講到我口水都乾埋，搞完11點幾仲要送老細翻屋企，雖然唔係好遠，但係真係攰到就死，一翻去攤上床就瞓著咗，下次真係咪再帶我去見咩客。」我嘆住氣咁同細強呻。
突然細強係咁fing手，好似示意我收聲咁。
「做咩？」
細強挑一挑眼眉示意我後面。
我擰轉頭一望，原來老細就係我後面，我頭先講嘅野佢聽到晒。