女神老細係我女朋友: 第五章
唔知係有咩驅使我，可能係手上份proposal有野想問，又或者只係好奇老細點解咁夜都都未走，我行咗去老細房門口，諗住隔住道玻璃門偷睇下老細係到做咩。
隔住道玻璃門，我隱約見到老細好似扒咗係枱面瞓梗覺，可能太攰掛，話晒聽日就要交野俾客，可能老細自己都忙呢。
不知那來嘅自信，我細細力咁打開玻璃門細步咁慢慢行入老細間房 ，行到去佢枱側邊，掃眼一望張枱，原來老細都好似忙梗我負責梗個客，應該係睇睇下文件瞓著。
見到老細面向咗我嗰面瞓著咗，我忍唔住痞低下巴掂枱咁望住老細瞓覺個樣。
人哋成日話女仔咩時候乜時候最靚最靚咁，我個人就覺得瞓覺嘅時候嘅女仔係最靚嘅，尤其係老細e種絕頂美女，嗰真係學皇上嗰句，dumdumdum，靚到dum一聲。
同第一日撞到佢個妝差唔多，都係嗰隻淡淡嘅玫瑰香水，pat留海啱啱好跌咗係面上，遮住咗小小塊面，散咗係枱上，瞓到咁都淨係有微弱嘅抖氣聲，個嘴上仲有小小濕潤，哈哈老細流口水，不過加上薄薄嘅唇膏咁睇落仲令人憐愛。
仔細一睇，老細仲係好後生，應該都係大我一兩年到，估唔到e個年紀就就到老細，佢又有冇男朋友呢，如果冇我有冇機呢？
正當我腦入面有百萬個可能性浮出嚟嘅時候，我留意到老細好似打梗冷震，原來佢件西裝褸掛起咗，上面仲有攤咖啡漬，哈哈老細平時咁強勢，原來又鐘意蠟筆小新又倒瀉咖啡，真係愈睇愈可愛。
見到個靚女老細凍到震晒，你叫我點忍心呢，我慢慢咁打開門行翻出去係我個位到拎起我件褸搭係老細個膊頭到，幾秒後就停咗打冷震啦，正當我諗住出翻去嘅時候，我聽到老細個肚咕咗聲，應該係忙到冇食過野，今日都冇乜點見老細出房。
幫人幫到底，更何況係靚女老細，我前日仲咁冇禮貌，留翻個好印象都應該嘅。
我記得今日翻工見到樓下有間7仔，就即刻落去買咗個杯麵加支烏龍茶，翻到公司我就去咗茶水部到淥咗個杯面再小心咁走入老細房放個杯麵同支茶係佢枱面。
老細真係愈睇愈靚啊「如果你係我女朋友就好啦。」唉吔！我又唔小心講咗心入面嗰句出嚟，希望佢聽唔到，應該噪唔醒佢嘅。。。
「Mmmm....」突然老個鼻索咗兩下，死啦，應該係個杯面沉味整醒咗佢，老細慢慢咁擘大眼。。。
「張志明？」
『大檸樂！』