女神老細係我女朋友: 第六章
老細突然起嚇到我打咗個突，即刻係枱邊彈咗起身，我什至有啲愕然老細記得我個名。死啦，e獲愈搞愈衰，諗住留翻個好印象俾老細，估唔到我句想老細做我女朋友噪醒咗佢，大獲啦今次。
老細捽一捽眼，坐翻直個人，用佢纖細嘅手指撥一撥佢有啲散亂嘅頭髮，將側邊散落嘅頭髮撥去耳仔後面，露出白皙嘅面容，指甲上隱約見到有淡淡嘅粉紅色指甲油，撥頭髮嗰下睇到我有觸電嘅感覺，睇到我有啲定咗，因為真係好靚。
老細用手拉實咗膊頭上搭住我嘅嗰件西裝褸，睇嚟佢仲未發現件西裝褸唔係佢，可能啱啱起身仲有啲凍。
「件褸。。個杯面。。。你？」老細望一望膊頭上嘅西裝褸，語氣變得比平時柔弱，可能係啱啱瞓醒，但係仍然不失氣勢。
「老.....老闆你醒....醒咗啊？我.....諗住入嚟.....問...問你公司啲啲嘢......見你......你瞓著咗......先.....如.....如果冇事我出.....出翻去先啦！」我由陶醉嘅感覺翻嚟現實。其實我嚇到有啲語無倫次，為咗唔再俾老細有咩誤會，我野都未講完就想轉身走出房。
「等陣。」我俾老細突然叫停咗係房門口。
我俾佢突然句等陣嚇到企咗係到，即刻轉個身過去「係.....咩事呢老闆？」
「我唔飲茶，你同我出去沖杯咖啡。」
「知道！」我唔敢怠慢，頭都唔回咁走咗去茶水部。一路沖咖啡我一路都係到諗唔知啱啱老細有冇聽我最後嗰句，不過老細叫到沖咖啡，我冇諗咁多就就快手快腳咁沖完。
「咖.....咖啡啊老闆，小....小心熱。」我雙手拎住隻茶碟，慢慢咁放係老細張枱上。
「嗯。你仲未走嘅？我記得你今日第一日翻工，都成8點。」
「老闆你今日交俾我份proposal仲......仲未做完，你講過聽日要交俾個客，所以我咪諗住做埋先走....」仲好講，多得你，搞到我今日第一日翻工都要OT，見你靚女，如果唔係先理得你。
「哦，係。我還掂都搞梗你嗰份project，你拎入嚟一齊做。你第一日翻工，我都唔想你OT咁耐。」咩話？我冇聽錯啊嗎，平時咁冷淡嘅老細居然會關心我e啲新仔？
「係！」e下可以話係我幾日嚟對住老細語氣最堅定嘅一句，我即刻快步走出老細間房。
「仲有.....唔該你...」老細細聲咁係我背脊講，我都差啲聽唔到，隱約聽到語氣比平時溫柔。
「？」我擰轉頭望一望老細，想聽清楚佢講咩。
「冇事。」老細扮咩事都冇發生過，逕至攞起枱上嘅杯面打開嚟食。
唉，其實我梗係聽到老細講咩啦，不過點都要俾翻佢強硬形象一個下台階嘅，所以我都係答咗佢係就出房攞文件，然後急急腳入翻老細間房開始做嘢。
『正啊，OT都可以對住個靚女，e獲賺翻轉頭啦。