女神老細係我女朋友: 第四章
一入到間房，真係比想像中大，本身公司規模都唔細，老細房有翻咁上下，房入面好似睇CCTVB啲劇咁都係一色一樣嘅裝修咁，唔同嘅係入到去又聞到老細嗰沉淡淡嘅玫瑰味，配上老細個樣真係好正。
「黃。。。老闆搵我咩事呢請問？」香還香，正還正，我而家係翻梗工，唔可以太多FF。
「你就係新嚟嘅project management group?」老細坐係張櫈到，一隻手飲住咖啡，另一隻手撳keyboard，翹起雙腳，依舊係霸道總裁式嘅語氣咁問。
「係啊。」我雙手係身前緊握，成碌木咁企咗係老細枱前，成手都係手汗，第一日翻工加上我見工嗰日做過嘅事，咁大個仔真係未試過咁驚。
「新嚟翻工都冇計，今日同我搞掂e份proposal佢，你成group得你一個有翻工，聽日趕住交俾個客。」老細係枱面推咗一大份file俾我，驟眼睇應該都有幾百頁紙。
唔知係因為老細嘅語氣定係我見得靚女少，係枱後隱約見到嗰啲被緊身皮褲包住嘅翹起嘅雙腿，老細係房係膊頭上搭咗件白色嘅女性西裝褸，纖幼嘅雙臂係西裝褸下若隱若現，幾樣加埋，老細莫明奇妙咁對我有種吸引力，我又再一次定咗咁望住老細，真係好靚。。。
「喂。」老細一句強而有力嘅喂打斷咗就我對佢美貌嘅欣賞，又俾佢發現我𥄫佢，真係好似愈搞個印象愈差。
『咁撚多？』我接過成份file心中暗嘆一句，第一日翻工就做咁大份野？
「有咩公司資料需要入嚟問我，出去做嘢。」老細淡淡咁講咗句然後撥一撥頭髮，就轉頭落去繼續打字。
真係想睇多陣老細啊。。。。不過為咗證明我係一個勤力嘅員工，我二話不說即刻翻出去我個位到坐低，開始做我手頭上成堆嘅野。
「喂，新仔，啱啱老細叫你入去咩事，你唔係第一日就俾人照肺啊？」我左邊突然有個同事轉過身係張櫈到滑過嚟八卦咁問我。
「冇野啊，第一日翻就俾啲咁嘅嘢我囉，要我今日內搞掂喎。」我舉一舉手上厚重嘅file俾佢睇。
「哇，咁大搭？啊係，我叫細強，我都係翻咗個零禮拜工咋，我係IT嗰面嘅，你呢？」
「我？叫我阿明得啦，我PM㗎，唉一翻工就要我單拖成份project.....」
「唔好頹啦，一陣一齊食lunch啦，我都未係公司識到人住，大家都新仔，以後照住大家啦。」
「好啊。」見細強咁友善，我又第一日翻工，雖然好多野，不過都叫認識咗第一個同事。
唔知係咪多野做定點，加上同細強得閒吹下水，食完個lunch話咁快就7點，但係我份project仲有成一半未搞掂，唉，第一日就OT，如果唔係老細親自叫到，我理得佢。
「走先啦阿明，努力。」唔經唔覺，成間公司都走得7788，office好似得翻我一個咁。
我係張櫈到伸咗個懶腰，左右伸展下筋骨，正當我擰轉頭嘅時候，我見到老細間房仲開住燈。
『老細仲未走？』