女神老細係我女朋友: 第三章
自從收到公司請我嘅消息我就足足用咗成日嚟準備第一日嘅翻工，唔知係咪因為有個靚女老細，我特登揀咗套好睇啲嘅西裝掛係房門，雖我都係得兩套，但係我感覺e套好似好睇啲咁，俾老細留個好印象嗎hehe，冇錯作為一個職業毒撚，FF程度係有翻咁上下，雖然早起身，不過今日過得特別快，一睇鐘已經係夜11點半，早啲瞓，第一日翻工唔可以遲到。
第二日我一朝就起身沖個涼，剃好鬚執靚自己早早咁去等巴士，第一日翻工早到係常識吧。
一翻到公司樓下，睇一睇錶，早咗成20分鐘。正當我行入門口嘅時候，有㗎七人車係我隔離嘅馬路停低，車門緩緩打開，黃小姐，唔係，係老細係後座行落車「唔該晒，阿全，拜拜」係同大堂保安田叔打招呼嘅語氣，估唔到原來老細都會早到公司喎。
老細同尋日一樣都係咁靚，今日仲著咗件白tee，緊身皮褲再加對5寸高踭鞋，casual得嚟又不失優雅，真係愈睇愈正。我又睇到個人定晒咁企咗係𨋢口，原來唔經唔覺我已經等梗𨋢。
「早。。早晨啊黃小姐，我今日第一日翻工啊。。。」我勉強咁向老細打個招呼。雖然我都知我尋日真係好柒，但係話晒都係我老細，尷尬都要講聲，加上今日仲要第一日翻工。
「嗯，早晨，以後叫我老闆。」老細又轉翻冷淡嘅語氣應我。
吓？點解唔係叫黃小姐㗎咩，我聽到尋日啲同事都係叫佢黃小姐㗎喎，點解我會叫老闆嘅？死啦佢會唔會係嬲我尋日啲行為咁冇禮貌，唉，點算啊？
冇計，工都要照翻，咁難得請你，希望做翻好個印象俾佢，話晒我都自問係一個有禮貌嘅人嚟。
「我係張志明啊，今日係第一日嚟翻工㗎，請問人事部係邊？」我同老細同步入到公司，一入去我就去reception問人事部係邊，而老細就唔快唔慢咁走入佢間房，最後人事部同事分咗我係正老細門口坐『唔撚係掛。。。』
「張志明，入一入嚟。」我背後突然傳嚟老細嗰把霸道又冷淡嘅聲音，我當堂嚇到彈起身咁濟，我擰過頭過後面一望，老細佢企咗係房門口半掩嘅玻璃門到叫我，然後即刻閂埋道門。
「係。」我唔敢怠慢咁即刻應咗句，然後隨即起身走入老細間房，e一刻嘅我真係好淆底，係咪第一日翻工就俾人炒，佢唔係當咗我變態佬啊。。。我驚到震咁濟行入房『仆街啦e獲。』腦入面彈咗句。