[短篇] 最後留言: 2.52/
2.52/
「信唔信得過架？」我提出質疑，金髮大叔認同我「仲話叫佢地入人基地，佢地賊嚟呀。」「佢地都無路行啦，況且運動場基地唔係傻嘅，會小心架啦。」隊長咁答我地。「互相利用啦，宜家仲知道佢地襲擊計劃，可以順便幫我地基地解決埋依個危機。」「咁要點做？」阿may問。「光頭佬話佢地其他一個物資倉係大公園附近間圖書館。。。」阿威諗咗諗「打劫返佢地？」金髮大叔搖搖頭「我地得七個人咋，況且都無乜時間。」我望望天空，深藍色漸漸滲出微光。「燒曬佢？」阿威話，「大批物資無曬，咁好咩？」阿may反對。tim「其實暫時呃到佢地過去就得啦，物資就再算囉。。。」阿威同阿may點頭同意。我地係一邊商量緊，同時光頭佬佢地留意住山上動靜。「喂，好似又追嚟呀！」光頭佬向我地低呼。我都聽到人聲已逼近，人數比頭先多。
隊長指示阿威「你同阿may開路。」阿威佢地率先前進探路。然後向光頭佬指住前路「運動場識路啦？」佢點頭領同伴跟上我同隊長。「你地小隊殿後。」隊長又向金髮大叔指示。「收到！」金毛大叔回應後同兩個隊長觀察山上，一路跟上大隊。我地左邊係草叢樹林，大樹幾乎遮掩曬光線，入面漆黑一片不時傳嚟怪叫，右邊係馬路，一架架破爛嘅大小車輛停係路上，少數屍攤瞓車與車之間。
我地一路向前跑，後方追兵都漸漸逼近。「反骨仔係前面！」「咪俾佢地走！」呼喝聲係身後遠遠傳嚟。人聲驚動左邊樹林嘅潛伏屍群。「吼！嗄！」同時追兵向我地開槍，暫時距離尚遠。隊長左右張望「出馬路！」，我地瞬即往右邊散去，跨過單車路同馬路中間嘅欄杆。當我地係車同車間嘅空隙穿梭時，大約十幾人嘅追兵團更逼近，都係手持槍械。佢地開始瘋狂向我地槍擊，好在我地早一步走過馬路。槍聲同屍叫越嚟越頻密，樹林屍群都開始攻擊追兵。我地匿係廢車群中，追兵係單車路上攻擊我地，而屍群由樹林湧出圍攻佢地。我將面前喪屍斬首時，光頭佬兩個同伴中槍。追兵同屍群廝殺時，我地加速逃向前方。
一路路到十字路口，我地轉向左邊進入大公園外圍嘅兒童遊樂場。隊長回頭望，「佢地就追到。」只見屍群數量雖多，但追兵憑藉火力下嘗試突圍而出。「去圖書館先。」隊長領我地越過滑梯同鞦韆，終於嚟到圖書館外。「roy你地係度等。」隊長率阿威阿may同光頭佬等人進入圖書館，三層嘅圖書館嘅玻璃窗同門幾乎都爛曬。我同金髮大叔及兩個隊員宜家先有時間互相處理傷口。當我地邊觀察追兵邊飲水休息，圖書館入面傳嚟幾下槍聲。我同金髮大叔對望一下，一齊衝入去，只見隊長同光頭佬扭打緊，光頭佬兩個同伴同矮瘦男仔，同阿威阿may槍戰緊。「隊長！」金髮大叔同隊員埋去幫手。我都向敵人開槍，撃斃兩人。矮瘦男仔跪地求饒「唔好殺我，我投降啦！」我舉槍行近，正想問頭先情況，但矮瘦男仔趁阿威轉頭睇阿may傷勢時，想執槍反抗。阿威反應極快立即一槍爆佢頭，佢即刻抱住阿may，只見阿may腰部中槍血如泉湧。光頭佬都畀隊員們綁起制服。「知你無咁好死！」「大家咁話啦！」隊長同光頭佬講。金髮大叔舉槍想了結光頭佬，隊長阻止佢「交佢畀啲追兵！」。光頭佬對隊長咬牙切齒。
我去扶隊長，佢手臂上有條深長刀痕。「我地一入嚟，光頭佬就突然開槍打我地，連開幾槍打中咗阿may。。。」我扶隊長去阿may個邊以及細望四周環境，樓上兩層書架處都擺滿一個個紙皮箱，地下依層嘅兒童圖書區都堆疊咗好多紙箱。「阿may點呀？」我問，「止唔到血呀！」阿威大叫回應。金髮大叔搜索兒童區話「好多罐頭同水！」然後係其中一箱搵到紗布棉花等急救物資幫阿may急救。「走啦。。。」阿may氣若浮絲咁講，金髮大叔同阿威攞住嘅棉花全部染血。「我會。。。」隊長神情落漠咁講，「隊長呀！」阿威哀號。出面嘅人聲又開始傳嚟，「放火。。。」隊長輕輕命令，金髮大叔睇住阿威阿may，搖頭扶隊長退開療傷。我點燃地上嘅紙張紙皮等雜物，拋向兒童圖書區嘅紙箱，隊員們則負責樓上兩層。
隊長拉住光頭佬率眾離開，只得阿威仍然抱住休克嘅阿may唔願走。我地係門口已經見到追兵逼近，喪群數量減少但仍然追住佢地。圖書館內濃煙飄散，隊長警惕咁指示「我地作狀還擊兩下就走，穿過公園至算。」隊員遲疑「阿威仲未出嚟。。。」，「佢得架啦。。。」隊長低聲回咗句。我明白末日下人命更輕如微塵，所有嘢都係一瞬間發生，一瞬間就要決定生死。「嘩，佢地放火燒圖書館呀！」「反骨仔帶佢地嚟，隊冧佢。。。」「快啲通知大隊！」追兵嘅罵聲同對話傳嚟，一陣混亂之下，由近至遠傳開嘅哨子聲，響徹雲霄嘅連串槍聲隨之湧至。隊長望咗望身後圖書館大門話「撤。。。」。我地開始往後退時，前後方同時傳出槍聲，係追兵同阿威同時向光頭佬開槍，亂槍之下，佢身上狂噴鮮血倒地而亡。阿威向我地點點頭，然後大伙向圖書館後散去。