[短篇] 最後留言: 2.53/
2.53/
追兵係圖書館前停止追撃，有人衝入圖書館，有人殺滅追嚟嘅屍，有人繼續吹哨子，都有人繼續追我地，但我地邊開槍邊退，佢地就無再追。大公園入面種滿大樹，綠草如茵，只係原本整潔寬敞嘅行人路上佈滿雜物垃圾。周圍嘅樹林暗處其實都躺滿屍群，由我聽到四周嘅粗重低沉呼吸聲可知。我地係園內奔跑向另一面嘅出口。後方雖然無再追撃，但佢地嘅呼喊聲同火燒嘅溫度令園內屍群蠢蠢欲動，低吼聲警告我地要盡快跑出大公園。「砰砰砰。。。」後面傳出多下槍聲，屍群嘅低吼更響徹園內，我回望見到屍群已將追兵淹沒，而且開始有屍追向我地。「砰砰」隊長向一旁大樹開槍，只見我地已被屍群包圍，隊長同金髮大叔掃射前面四五隻屍，但殿後嘅兩個隊員被屍捉住，即刻有三四隻湧至分食。阿威向屍群開火但只激起佢地攻嚟，我拉住佢走。係金髮大叔火力掩護下，我地退至魚池旁。隊長指住池對岸「出口係個邊，一出就係大馬路。。。」我射殺兩隻屍，阿威將衝近嘅幾隻屍掃清後已用盡彈藥。金髮大叔遞上一排彈藥畀阿威「你地行先。。。」，隊長望望我地，率先跳入池。我同阿威緊隨其後，大家搏命向前游，但遲遲唔見金髮大叔落水。我回頭就見到佢畀十幾隻屍包圍，雖然將子彈全部射入佢地頭上，但仍阻唔到第二批第三批屍湧上嚟，好快佢就畀屍群遮蓋，金髮大叔就咁無聲無色咁消失，只剩下低沉屍吼。
我地三人搏命游到對岸，未及再回望又再被屍群攻擊。魚池前係一列列長櫈，再往前係一個圓形空地，以往好多大媽係度跳舞。宜家就變成群屍休憩用地，數以百計喪屍係度攤瞓，左右兩旁嘅草叢樹林內更加係難以估計。「砰砰砰砰砰砰。。。。」我地向撲近嘅屍狂轟，但殺得一浪屍潮，另一浪又至。我地背靠池邊無路可退。我射殺兩屍後，手槍耗盡咗子彈。隊長同阿威掃蕩一浪攻勢後，都宣告彈盡。我掉低手槍，抹抹面上嘅汗水，「唉，仲有無計。。。」。「無啦。。。」阿威抹抹額角，係褲上側袋抽出一把軍刀。隊長環顧四周，由背包攞出最後一排子彈上膛，「依度去閘口幾百米，得返一枝槍。。。」「隊長。。。一個人成功就已經夠。。。」阿威望住我地講，講完就揮刀衝向空地前方，我同隊長都拔刀跟隨。阿威一刀刀斬向屍群，比平時兇悍勇敢，好似將滿腔鬱結一口氣爆發，遇屍殺屍，我地係佢後方幫佢補刀，開出一條路殺入空地中央，但越嚟越多屍逼埋嚟。
阿威一腳踼倒一隻屍，但另一隻跛腳屍捉住佢手臂，佢換左手持刀連斬幾刀，條屍依然唔放手，兩三隻屍又撲嚟。我全力衝近撞向撲近阿威嘅屍，隊長一槍轟向跛腳屍頭上，阿威先甩開得佢。我地企係空地中央，稍為回氣，一雙雙腐爛嘅手又伸埋嚟。阿威依然殺得興起向閘口逼去，隊長依然未見疲態，奮力緊貼阿威。我被佢地嘅意志鼓舞到，繼續大開殺戒，我劈倒纏住隊長嘅肥佬屍，自己就畀三隻矮我兩個頭嘅小朋友屍拉住。我搏命斬劈先甩到一隻，兩臂畀佢地抓出幾條爪痕。隊長用孔武有力嘅雙臂捉住兩屍條頸，拋向一旁屍群。阿威係前面搏命衝殺，全身更加已經中咗無數抓痕，上衣佈滿一道道血痕，半件衫染成血紅色。佢雖然𡚒力向前衝殺，彷彿無受傷咁，但始終係血肉之軀，鮮血由阿威手臂一直流下。一隻健壯嘅屍一爪劃係佢腰上，阿威隨即倒地，利爪再刺中阿威胸口。隊長瞬間向嗰隻屍連射三槍，我再衝前一刀斬向佢頸了結佢，然後扶起阿威。隊長邊撃殺逼近嘅屍，邊同得一齊扶阿威退到閘門。
「砰。。。」最後一槍打響，我地挨係閘前。隊長扶住喘住大氣嘅阿威，我推開銀色嘅公園大閘門，「好彩無鎖。。。」，回頭見隊長同阿威通過閘門時，一隻長髮女屍咬住隊長左手，隨即有兩隻屍撲向隊長。阿威捨身撞向三屍，隊長揮刀連續斬向女屍頸。我撲上去拉出隊長，但阿威搏命拉埋度閘，三屍向佢瘋狂嘶咬，「隊長。。。roy。。。走。。。」佢邊講，身後嘅屍將佢壓係閘上吞噬，「我。。。頂唔到幾耐啦。。。」我未及回神，隊長推咗我一下就調頭走。隊長頭也不回向前面公路跑去，我唯有掩住耳跟上。但隊長跑咗無幾遠，就仆係街燈旁邊。我上前睇佢，佢面色蒼白，手震曬咁。「最後依段路啦隊長。。。」「我可能。。。頂唔到。。。」佢展示左手尾指至無名指嘅傷口，咬痕隱隱流出黑色鮮血。我唔知點做，後面嘅慘叫同吼叫令我更焦急。「roy。。。幫我斬。。。」隊長滿頭汗，雙眼通紅，眼中流下唔知係淚水，汗水定水池水。「斬？」我舉刀愕然。「快。。。」隊長伸手撳住地下，我深呼吸一下，度咗兩次位「一。。。二。。。」一刀落下，鮮血噴灑。隊長嘅叫聲融入吼叫。我即刻用圖書館嘅剩餘物資幫隊長止血，「隊長。。。你好勇呀頂住呀，就到架啦。。。」「勇。。。我一啲。。。都唔勇。。。佢地先係勇。。。我一直都。。。好自私。。。怕死。。。我都係想見返老婆咋。。。」佢邊講邊望向公園方向。「送到疫苗過去你就有救。。。就可以去搵你老婆。。。」