[短篇] 最後留言: 2.51/
2.51/
我地兩個小隊七個人作最後準備，然後就出發。我地今次都配備咗較重火力，各自都有槍械，係比一般日常巡邏，同搜索資源時更高嘅武器配置。一行人隨隊長悄悄行出校門，往山坡上進發。我地首先要越過座山，經行山徑落返山，沿住單車徑去大公園，穿過大公園再經公路最後到運動場。
我地步速算快，因為天光後屍群會更活躍。所以隊長計劃天光之前到達，時間上頗緊湊。係山上行走間中遇到零星落單嘅喪屍，隊員們都以暗殺方式，稍稍用刀解決。「ok！」金髮大叔輕聲講，「大家盡量唔好開槍。」隊長指示大家。我地一路爬山一路清除落單阻路嘅喪屍。「。。。咪住，前面有好多。。。」阿威向大家揮手示意。大家即刻警覺停步，觀察前方。只見前方有七八隻屍攤係草地上。「散開。。。」隊長話。大家靜靜散開係屍群旁行過，我手緊握𠝹刀以防佢地突襲，一路前進一路望住佢地動靜。一行人順利由屍堆中穿行，我地鬆一口氣，隊長手勢示意盡快離開佢地。大家繼續往山上攀行，除咗幾隻獨行嘅喪屍外，暫時未有太大險阻，所以隊長畀大家係涼亭休息。我飲咗啖水，望住仍然蔚藍夜空。「頂得住？」隊長行近我身邊問，「大把貨，多多都有！」我答。「落咗山先係主菜，同埋。。。個班人都未出現！」佢邊講邊望周圍。我知道隊長講緊嘅係周圍打劫避難所嘅嗰班賊，「一路經過咁多站都無事，希望最後依站都見唔到佢地啦！」我同佢講。隊長黠頭，指示大家繼續前進。
過咗涼亭再向前行，就進入行山徑開始落山。一路上無乜大麻煩，令到大家士氣不俗，步速加快。但向山下快走無耐，隊長忽然叫停咗我地。原來前面行山徑分岔口有兩個阿叔企係度。「唔係咁橋啩。。。」我望向隊長，佢靜心聽對方動靜。「聽講話有疫苗喎。」「挑！咁又點。」「咁個世界咪正常返囉。」「就算真係有效，都唔係即刻正常返啦，要恢復返原本咁都唔知要幾多年啦。。。我地咪又係做賊。。。」講完就攞起腳邊嘅紙皮箱離開，唔知係咪嗰班賊，但手上破舊紙皮箱應該係搶嚟嘅物資。佢地行嘅方向同我地一樣，所以我地散開，匿係行山徑兩旁嘅草叢慢慢跟上去。一直行到一個小涼亭，見到有四五個人係度休息，「喂，你兩個咁耐先到。」一個光頭漢講，兩個大叔回話，「我地攞住兩箱嘢呀！」「你地淨係帶個人走緊快啦！」，光頭漢望望佢地身後「得你兩個咋？其他人呢？」，「無啦，其他兄弟畀大佬發現咗，我地好彩走甩咋。」。「咁宜家點?」一個矮瘦男仔問，光頭漢拍拍佢膊頭，「我地幾個靠自己一樣生存到。」「睇下我地有咩資源先啦。。。我地好彩走到咋。。。」。「睇嚟佢地內鬨喎，佢地仲耍無計劃就走出嚟。」我心諗。「似鬼打鬼喎。」阿威咁講。「佢地一枝槍都無咁喎！」may觀察佢地行裝後話。阿威同另一年輕隊員阿tim交換咗個眼神，「咁就唔怕佢啦！」拋低句說話就一齊衝咗出去。「咪郁！」二人向班賊大喝。
我地同班賊同樣呆咗一刻，「又唔聽指示。。。」隊長皺住眉講，然後率領我地現身小涼亭。「你地想點？」光頭漢見我地有槍冷靜咁問。「你地就係之前幾次襲擊大文小學嗰班賊？」阿威提槍問。「你地就係送疫苗嘅人？」光頭漢反問。「你地又計劃襲擊我地基地？」隊長問光頭漢。「你地都偷聽到啦？」一大叔答，「唔關我地事，我地啱啱係基地走出嚟。」矮瘦男仔接口話。「你有你送藥，我有我走，大家當無見過囉！」光頭漢望住隊長講。正當我地對峙緊，山上傳嚟嘈雜腳步聲同對話聲，似乎有一大伙人逼緊。矮瘦男仔面露懼色，「唔通係佢地追到嚟？」我細心一聽，來者人數眾多，呼喝聲漸近。「捉到佢地打獲金先！」「搞掂佢地就分多啲啦！」。大叔驚呼「真係嚟捉我地呀！」。隊長指示「我地避開先！」我地即刻向草叢散去，後面緊接傳嚟槍擊聲。光頭漢都率眾跟我地撤退。
我回頭一望，只見追兵大約十幾人，人人手執槍械，瞬間射中其中一個賊。我同阿威邊走邊還擊，打中佢地其中兩個人。光頭漢小隊其中一個大叔中槍時，我地躲入咗草叢揾到掩護。雙方對恃子彈橫飛，隊長指揮我地互相掩護
「威，tim掩護我地！」講完領我同may突破佢地微弱嘅防線，撃斃多個敵人。對方忽然停止攻擊，隊長率我地退後觀察。「吼！呀！」我地立即意會，「係。。。係屍呀！」矮瘦男仔嚇得大叫。只見涼亭後開始出現屍影，追兵向佢地攻擊。隊長揮手話「趁宜家撤！」，光頭漢佢地都跟隨。我地沿行山徑向山下跑，耳邊一直傳嚟槍聲同屍叫，睇嚟追兵們同喪屍陷入激戰。
跑咗約十分鐘終於落咗山，山上嘅廝殺聲已經停咗，但人聲更熱烈，似乎有更多人落緊嚟。我地暫時係單車路旁喘息，隊長同光頭漢談判「不如合作？」「點合作？」「我地送疫苗，你地要避開大佬，大家幫大家！」「我地有咩好處？」，阿威插口「你地槍都無枝，遇到屍同追兵是但一瓣都仆街啦！」「送到去睇下人地基地收唔收留你地囉。。。」隊長望住光頭漢，光頭漢望望同伴，個個都點頭，「仲有呢？仲有咩想知？」隊長笑話「既然問得，應該估到啦。」光頭漢詳細交代咗襲擊我地基地嘅計劃。