[短篇] 最後留言: 2.4/

2.4/
    ////////////////////////
我緩緩醒轉，眼前嘅情景嚇我一跳。「醒啦？你認唔認得我？」我撲上去攬住面前嘅千怡。「你無事呀？咁就好，咁就好……」我攬到佢好實。「你昏迷咗好耐啦，我問你有無事就真？」我望住佢，只係識搖頭，然後再攬緊佢，想確定我真係見得返佢。「你無事就要起程啦！」「去邊呀？」「早幾日我個基地送疫苗去到大文小學……」「我知，原來我地就差嗰少少距離！」「你地最後一嗰站傳送失敗咗……我地無辦法阻止感染擴散……唔……」佢掩住頭，似乎劇烈頭痛。「千怡？」「……你快啲走……大家……知道無疫苗……之後，連最後嘅信任都無埋…更加癲曬咁…互相爭資源，唔…人越嚟越少…越嚟越多人感染……」千怡一邊講，額上就一直標冷汗，佢咬住牙，青筋都現埋。「你都感染咗？」佢望向窗口，身體微震，「走……」。依個走字令我諗起andy。我呆咗思緒陷入混亂，我感覺到有嘢唔妥。但望住千怡嘅背影，我唔想走，反而攬住佢，「我見得返你，無地方想去啦。」佢身體震得好勁，亦都低聲哭泣。我地同時講出同一句說話，「如果仲有疫苗就好啦」
    千怡轉頭面向我，佢雙眼已經佈滿血絲，頸上青筋突出，睇嚟就快變喪屍。我再次攬住佢，佢身體抖震得幾乎捉唔實佢。佢口中傳出低吼「嗄……嘶……」，我只係最後一次攬實佢，任由佢噬咬……
////////////////////////
    我驚呼住醒咗「千怡！」。眼前係我地避難所嘅病房，得我自己一個。「頭先發夢？」我心諗，起身望望周圍熟悉嘅環境，然後行去開門。一開門首先映入眼簾嘅係隊長嘅身影。「真係發夢……」隊長聽到就轉頭望我，「好返啲未？」。我搖頭，「頭先發惡夢……」「嗯，咁希望惡夢快啲完。」「我想幫手完咗個惡夢佢。」隊長微笑。
    隊長安排好一切，我攞咗武器同其他裝備，係會議室同隊員們開會。「今次去運動場基地，條路線最危險就係大公園，其次係最後嘅公路上。」「大公園？個度隨時匿埋幾百隻屍……無第二條路咩？」有人擔心咁問，隊長繼續答「最快去到就係穿過公園，如果兜過去要行遠好多。」佢指住地圖示意，大家睇住地圖都無出聲，「穿過公園之後經公路，行到尾就係運動場。」大家你眼望我眼更加無人講嘢，因為嗰邊嘅公路係區內最大嘅交通樞紐，宜家俾聽屍群佔據，末日前日日撞車塞車，宜家就經常發生激戰，人屍爭路。「我地小隊決定去」阿威代我同阿may講。我同阿may點點頭。「如果唔想去嘅可以選擇留守，成功與否都要有人手保護依度。」隊長掃視大家。
    「咁好冒險喎，耍咁多team人去搏……」「係囉，為咗啲唔知有無用嘅疫苗去搏，無必要……」「今時今日所有嘢都要搏架啦，如果疫苗係ｗｏｒｋ，咁就絕對值得搏啦……」「一年嚟次次話出到疫苗，係得今次先真係有希望，之前咁多人搏咁多人犧牲都係因為咁啫……」七嘴八舌之下，四個小隊十幾人只有一個小隊肯同我地去。