[短篇] 最後留言: 2/

2/
       我陷於一片混亂中，越嚟越多嘅屍逼得我本能咁逃走，已經理唔到身後發生咩事。學校入面都派咗人出嚟，佢地邊向我招手邊跑過嚟。我向前跑咗幾步，耳邊傳嚟熟悉嘅聲音「爺爺...」。我停低腳步，回頭想聽清楚。「爺爺...」我一回頭就俾屍群掩沒......
  
 
//////////////////////////
 
「砰...砰...」男人向屍群開咗兩槍，身邊同伴執起華叔留低嘅布袋。學校內嘅人大叫「攞到啦，大家返嚟啦！」校門外廝殺緊嘅倖存者紛紛撤入學校。屍群未能突破用木板同雜物加固嘅學校大鐵閘……


「情況就係咁，我地趕唔切救個男人。」一個身形魁梧嘅中年男人向眾人訴說。「咁個女仔呢？」一個女人問，「我地趕到去，已經唔見咗佢，不過頭先見到阿強佢地巡邏小隊係個女仔附近。」「咁宜家佢地人呢？」一個老伯問。「仲未返…」男人點頭答。「希望阿強佢地救到個女仔啦……」女人嘆氣。男人輕拍枱上木盒「咁我陣間出發之後，依度就交俾大家……」眾人點點頭。




 
我同兩個隊員將物資送返儲存房時，係走廊遇到退出會議室嘅隊長。「隊長！」我地同佢打招呼。「返嚟啦？順利嘛？」佢捧住個木盒問。阿威大笑「今晚食罐頭放題都得吖隊長。」「好，咁放好啲嘢，陣間過嚟開會。」may好奇「你攪住個咩盒呀？」隊長只係催促我地交付物資同裝備。
  安置好物資去到會議室。會議室嘅大枱係由六張學生枱拼湊而成，已經俾隊長堆滿嘢，中間位放咗之前個木盒同一張破舊地圖。阿威望到「咩事呀隊長？」我望住個盒「係疫苗？」阿威同may有啲訝異，「係。」隊長話，「你地幾隊搜索隊出咗去無耐，佢地就到咗，係基地出面俾屍圍。」「咁我地即刻要出發？」「嗯，之前仲大家研究過……」佢地傾緊個陣，我靜靜地退出會議室。
  係四樓走廊望出去，可以見到依區嘅景色，住宅，運動場，公路……一年一樣，兩個月前都一樣，係我地唔同咗。喪屍感染傳播只係一瞬間嘅事。政府嘅大型避難所相繼失守，倖存者自組大小避難所。組織，破落，重建，失守，聚集，失散，所有嘢不斷重覆......宜家終於有𥌓光......但我唔想同佢地冒險，兩個月前我原本嘅基地失守，我同女朋友同其他同伴失散咗，依兩個月不斷搵佢......「仲考慮緊？」隊長問。「嗯。」「我唔想講咩道理...如果你揀留低，咁大家就交俾你保護......」佢俾咗個染血又破損嘅布袋我，「前面嘅人留低嘅」講完就行開咗。我翻開布袋，爛舊衫，木棍，士巴拿，螺絲批......都係啲普通物資，但竟然有部錄音筆。我疑惑咁開嚟聽，「今日係三月三號。我地準備出發送疫苗出去…我地研究所就快頂唔住，但係教授佢地…佢地決定留低擋住班感染者...」背景傳嚟巨響結束咗段錄音，接住下一段「頭先…頭先研究所俾附近倖存者攻擊，佢地想搶疫苗......咁啱遇上入侵嘅屍群，我地趁亂走甩......」，下一段都係運送嘅人所留嘅說話。我撳最近嘅錄音，「我...我叫郭華，以前賣豬肉嘅...估唔到依幾年要劏屍...我唔知你地聽唔聽到，但係...我好想同你地講...對唔住...我...」隨意播另一段，佢嘅聲音即刻震撼咗我......
係千怡......