[短篇] 最後留言: 1.4/

1.4/
        我地一直匿係天橋分岔口轉角位嘅一堆紙皮雜物中。屍群一直漫無目的咁搜索，而我地就幾乎連氣都唔敢喘一下。好在佢地好快又回復休息狀態，悄悄散退。
       四周漸漸回復平靜，我地稍為鬆一口氣。我睇睇地圖，我地離目的地只差一小段天橋路段同一段上山斜坡嘅地面路段。但……「頂得住？就到啦。」我望望𡃁妹鮮血淋漓嘅腳問佢。佢無答我，但雙眼一直望住前面筆直嘅天橋同遠處上山嘅斜路。「𡃁妹？」我輕輕拍佢膊頭。「依度……我以前……」佢雙唇微震，我唔知佢係咪諗起啲咩，但「點都好，到咗先啦。」佢聽到依句緩緩點頭，簡單重新包紮傷口後，我扶起佢。「我頂得住，仲有一段路啫。」我望望周圍，確定已經無乜屍活動緊，然後扶住佢繼續行。一路行我一路觀察天橋上為數不多嘅屍，我地盡可能唔發出半點聲響。雖然安全通過天橋落返地面，但𡃁妹似乎已經行唔到。佢腳上一直不斷流血，攰倒在地。我不停觀察四方，身處路邊無乜雜物掩護，比係天橋上更有風險。「我地無急救用品……」「我知呀華叔……如果有咩事……最緊要啲藥送到去……」佢依句深深打入我心入面……
 
「阿爸，最緊要阿囡安全，就當係我最後願望……」……
 
我個女當時高燒唔退，我地一家三口已經匿係屋企兩個星期，一早已經無曬食物。我出去搵食物個陣遇到忠伯啲同伴，知道佢地避難所嘅存在。阿女於是要求我帶細妹走。幾個同伴嚟接我地個陣遇到屍群……我就咁拋低咗個女開始撤退……細妹當時喊住唔肯走，自己走返入屋，我面對屍群我真係無勇氣留低……
 
       諗返當時情況，我又再忍唔住淚水。「華叔？」我另轉頭唔望佢，抹走眼淚，同時眼尾見到天橋底下有架手推車。我行近檢查，架車斷估係之前啲老人家用嚟執紙皮。我即刻推返去𡃁妹身邊，「用到架，我推你過去。」𡃁妹點頭坐上車。我地繼續踏上前往目的地嘅最後路段。雖然𡃁妹瘦身形唔算重，但要推住個人行斜路都咪話唔辛苦。架車一路行一路發出啲零件生銹嘅「吱吱」聲，每一下都令人標曬冷汗，就怕會驚醒攤倒係街角嘅屍。我地緩緩前進，漸漸見到嗰間係街尾嘅學校，𡃁妹忽然叫停「停車呀華叔！」我即刻停低，佢挨住架車手柄，周圍望「有個人……我要搵……」「明嘅，記得就好……」我繼續推車，但車轆唔知撞到乜，我正諗住望望，架車就甩轆炒咗落地，「唉呀！」「頂！」我地驚呼伴隨炒車聲，似乎驚動咗左右嘅屍。「嗄…….」「嘶呀……」我扶起𡃁妹時已經見到附近三幾隻屍醒咗低吼住。我趁佢地未見到我地，即刻揹起𡃁妹往街尾狂奔，一路講「仆街仆街…….」當然啲屍好快發現我地，亦好快追上嚟。正面布隻跛腳嘅行近，我粗暴咁踢佢無跛嘅腳，踢開咗佢。但行咗幾步，後面有兩隻手拉住𡃁妹。𡃁妹反應迅速，小刀係電光火石間連連刺向隻屍個頭。我放低𡃁妹，接過佢把刀，了結埋跛嗰隻屍。但另外一隻又逼近，我揮小刀繼續斬屍，但把刀卡住係隻屍心口，𡃁妹及時係布袋攞出兩把士巴拿扑死咗佢。殺得一隻兩隻，但喪屍數量越嚟越多。我即刻揹起𡃁妹又再衝向目的地。
       屍吼聲不斷逼近，最後我地被幾隻屍撲倒，我同𡃁妹一齊仆低。啲屍逼到面前時，「砰…砰…」兩隻屍被爆頭。「係咪忠叔個邊架？」回頭見到兩個中年男人係校門前大叫，「係…係呀….」我大叫回應。「𡃁妹有救啦….」我向不遠處嘅𡃁妹叫，佢掩住頭，可能啱啱撞到頭。「華叔….我…我叫千怡…李千怡…」佢邊講邊笑，但眼淚都流緊。佢未講完，屍群突然湧出，將我地隔開，我已經望唔到佢係邊。