[短篇] 最後留言: 2.2/

2.2/
               「我......我唔知自己係邊個，或者以後會遇返識嘅朋友嘅，不過宜家最緊要都係安全送到疫苗去終點基地......希望我地尾二依站順利啦......」我俾依把聲嚇呆咗，不斷重覆播咗幾次，我肯定係佢，係千怡把聲。我衝落二三樓去大家居住嘅課室，搵建立依個基地嘅元老們。我係三樓走廊見到照顧緊細路仔嘅麗姨，「麗姨!麗姨!」「咩事咁趕呀roy仔？」「頭先你地開會......係邊個送疫苗過嚟架？」「一男一女囉。」「咁佢地宜家係邊？」「隊長話個男嘅原本救到嘅，但佢忽然間停低就俾啲屍......」聽到依句我急忙問佢「咁個女仔呢？個女仔點？」「隊長想過去嗰陣已經唔見咗佢，但係阿威佢地話當時阿強小隊返咗嚟，咁可能救到個女仔。」我跪咗係佢面前「可能...可能...」背脊上已經標曬冷汗。我強行定一定神，問麗姨「咁隊長係邊？」「武器室。」我點點頭向一樓衝去。嚟到武器室門外，連衝帶撞撞開門。隊長點算緊武器，俾我嚇一嚇，然後問我「聽咗啦？」,「個女仔......」。佢望住我，遲疑咗一刻「同你銀包張相有啲似......sorry......」我講唔出說話，耳邊開始傳嚟「溫溫」聲，眼前事物變得模糊，直至無曬知覺......
        當我恢復意識，第一時間聽到嘅係對話聲，但聽唔清楚內容。我緩緩張開眼，「醒啦醒啦！」阿威大叫。在場嘅人係幾個元老，隊長同我兩個隊員。元老陳伯「見點呀roy仔？」我雖然有啲頭痛，但無乜大礙，所以搖頭「無乜事啦。」阿may倒咗杯水俾我「唔好咁悲先啦，千怡兩個月前都無事，宜家都......」我原本飲水嘅動作停低咗。阿威伸手揞住佢個口，「頭先咪講咗唔好刺激佢囉！」大家擔心咁望住我，「我想休息一陣。」佢地唯有先離開，阿威臨走前講咗句「有咩記得叫我地，唔好做傻事呀bro！」佢隨即俾隊長拉走。「威仔呀講少句啦。」「後生硬係咁衝動......」陳伯同麗姨嘅責備聲係佢地閂門前傳嚟。
        我飲咗啖水，腦海有好多嘢諗。千怡宜家點呢？當初留係依度係因為我地係附近失散，我想留低搵佢，咁宜家呢？我唔想幫手送疫苗，因為要搵千怡，如果佢唔係度，我係咪應該同大家去搏命呢？我唔知，越諗越頭痛。最後我播住千怡最後嘅留言，合埋眼唔再諗任何嘢。然後朦朧間就瞓著咗。