[短篇] 最後留言: 1.3/
1.3/
屍犬都想爬入嚟，我接過𡃁妹把刀向屍犬砍去，砍咗幾刀佢終於肯退走。我退後幾步攤坐地上，抹抹面上汗水。轉頭見𡃁妹一樣滿頭大汗，綁起嘅馬尾幾乎滴出水。我係布袋攞水樽俾佢，發現佢隻腳有條深長血痕，「隻腳點？搞搞先」。我係布袋度搵咗件舊衫撕爛幫佢簡單包紮，「無事，俾木板鎅到啫」。忽然佢摸摸手腕後東張西望，係地上搵嘢，「搵咩？」「手鍊呀，刻住Ｒ＆Ｃ…」我係腳邊搵到條銀色手鍊確係刻咗「Ｒ＆Ｃ」，交返俾佢「男友定屋企人送嘅？」。𡃁妹搖搖頭「唔知…我淨係知條鍊好緊要…」「總會記得返嘅。」我整理身上裝備，都觀察下周圍。
我地避難所入面，大家都叫佢𡃁妹，因為佢根本唔記得自己個名，同發生過咩事。我地係搵食物個陣遇到佢，當時佢俾喪屍襲擊緊。救返佢之後佢就加入咗我地。
𡃁妹睇住地圖，「仲要過多兩個商場就到佢地基地大文小學。」我點頭「嗯，依個場二樓依層周圍都係瓦礫，好似無屍，不過天橋係三樓，三樓同地下都好多屍…」依個商場呈圓柱形狀，𡃁妹撐起身行近場中間欄杆處向上下層眺望。我整理好布袋行近佢。只見依個場幾乎半倒塌，半壁頹垣敗瓦之中屍群集中係地下，三樓只有少數。但扶手梯俾瓦礫覆蓋，唔知過唔過到，更唔知穩唔穩陣。我靜靜咁行過去視察，一邊望向下層動靜，似乎屍群大部份仲沉睡緊。但行近中央扶手梯位置一睇，雖然爛得幾嚴重，又好多碎石雜物阻塞，但最大問題係其中一段穿咗個窿。「咁Ｌ係掛…」我周圍搵樓梯，但樓梯似乎隱沒咗係半棟商場癈墟中。𡃁妹指住扶手梯「無得揀啦華叔…」我嘗試搬開啲雜物，大件啲嘅有幾張凳，電器風扇電視都有，細件嘅有衫褲籃球足球之類。我地盡量輕聲開路，避免嘈醒樓下班嘢。我搬到喘曬氣，𡃁妹更加辛苦，佢強撐腳傷之痛，我地終於前進到扶手梯斷開嘅位置。穿窿個位大約有半米，我退後一步，大步撲向前尚可跨過。我拉緊扶手，回頭伸手準備接𡃁妹。佢都退後一步深呼吸一下，苦撐住撲過嚟。我雙手接住佢後一齊撞倒落地。𡃁妹腳上傷口已撕裂咗包紮嘅衫碎都染紅。但我地未及休息，因為𡃁妹跳過嚟個下撞跌咗個籃球落樓下。
個波砰一聲打中一隻屍，震撼全場生物。一聲吼叫喚醒一眾同伴，更有屍似乎發現我地，向我地方向怪叫。我扶起𡃁妹向上層衝去，好在三樓無屍。我地即刻跑向天橋。係屍群追出天橋時，我地已及時匿藏係紙皮雜物後。佢地發現唔到人類，好快就散開瞓覺。