[短篇] 最後留言: 1.2/

1.2/
                我地踏出避難所前，𡃁妹同我講「我信你會見返佢地架華叔。。。」「嗯希望啦。」「不過我真你未見過你喊個樣喎…」我拋件外套俾佢，「我收返句多謝。」然後拉開大門行咗出去。「小器！」佢踏出大門後，回頭向忠伯同幾個師奶話，「你地鎖好門，小心啲！」鐵門重重關上。
    「下一站係隔幾個屋邨嘅商場，正常行地面好快，但宜家行天橋穩陣啲。」我一邊講一邊行入梯間。經依條樓梯向下落幾層就到商場。其實我地嘅避難所就只係一個屋邨公用平台，可以上通住宅下達商場。位置上四通八達方便大家出入搜索物資，但都令其他惡意嘅倖存者同喪屍便於攻擊。聽聞忠伯同一眾街坊建立依個避難所時，犧牲嘅人命慘不忍睹。我地小心翼翼咁行落樓，成條樓梯佈滿雜物，有啲用嚟做遮掩，有啲係戰鬥後留低嘅，都有啲係積存嘅垃圾。𡃁妹不時觀察下層情況，我就清除緊啲雜物。一直行咗幾層去到商場，係大門望出去已經見到幾隻喪屍瞓係地。我仲觀察緊，𡃁妹就已經推開咗門。我怒睥佢，佢指指周圍話「瞓曬啦！」。
     出事前我唔係住依區，嚟咗依個基地都只係好短時間，所以對環境只得大約印象。「依個場唔大，快快手過就得。」我指示。𡃁妹指住前面幾個舖位外嘅天橋入口「趁無乜屍衝啦！」未講完又衝咗出去。我唯有跟住，好在個場好細，逗留嘅屍好少，只得三幾隻係附近瞓。我地到達一條長長天橋，向下望只見馬路上都係壞車同一地喪屍，大部份都瞓著，只有一兩隻仲漫無目的周圍遊蕩，不時發出低吼。我地輕聲跑咗三十秒到達咗天橋間嘅分岔口。向右係通向地面嘅樓梯，向前係另一屋邨，左邊先係正確方向。我地向左直跑，右面球場上嘅情況嚇我一跳，𡃁妹差啲叫出嚟。因為成個球場瞓滿曬喪屍，仲逼過維園，而且仲傳出陣陣惡臭。「咩味？嘩…」「咪望啦，遮住臭跑啦。」我催促佢，更加阻止佢唔倖佢望落去。球場上喪群中有一啲人體殘肢散落地上。依個畫面依陣味令人作嘔。
     跑到另一連接處時，𡃁妹問咗個問題「奇怪，成條天橋都無屍？」我未及反應，答案已經向我地衝嚟。三隻滿身爛肉，露出腳骨肋骨嘅喪犬向我地狂吠而且速度驚人。其中一隻已經追上嚟咬住我個布袋，「仆街…」我抽出布袋內嘅棒球棍，一棍毆落佢個頭度。𡃁妹揮小刀補上一刀，砍中佢頭上。另兩隻俾我逼退。我推開中刀嘅屍犬，拉住𡃁妹繼續跑。另兩隻無追上嚟，轉而攻擊中刀嘅同伴。雖然佢地無追上嚟，但之前嘅吠聲驚動咗樓下屍群，嘈醒咗部份喪屍。
    我地又經過一個分岔口，左右兩邊都有屍犬聞聲而至。我無講嘢拉住𡃁妹向前面目的地衝去。片刻間四隻屍犬已到，我轉身一棒擊傷一隻，同伴濃濃嘅血液緩和咗佢地嘅攻勢。𡃁妹狠狠刺中一隻，隨即令佢地自相殘殺。我地繼續奔逃，但又有三數隻阻截過嚟。𡃁妹被一隻跛腳嘅撲倒在地。我一棍迎頭痛擊佢。另一隻撲上嚟，異常大力咁扯走碌棒球棍，我俾佢順勢拉跌。佢即刻又撲過嚟，大口利齒咬埋嚟，我唯有用個布袋頂住佢個口。𡃁妹過嚟狂刺落佢條頸。我一腳踢開佢，鬆一口氣後即刻係袋入面攞個鎚仔出嚟。趁佢地爭食同伴條屍，我地繼續走，終於見到左轉無幾遠嘅商場入口。後面有三隻屍犬又追上嚟，我地邊打邊行，佢地窮追不捨。去到商場入口先見到大門俾木板封死曬，「shit!」𡃁妹大叫。三犬不斷撲過嚟，我吃力咁舞把鎚抵擋佢地，「拆板啦頂唔住啦！」我邊喝邊打爆一隻屍犬個頭，聽到後面瘋狂撞木板嘅聲。「等我嚟！」我講完就同佢換位，用鎚仔搏命扑木板。依刻唔理後面點樣，唔理會唔會引屍嚟，淨係全力扑。
    終於俾我扑出一個缺口，勉強夠半個人過。我即刻穿過去，回頭見𡃁妹一對二，左閃右避好危。我飛個鎚埋去打中一隻屍犬，𡃁妹補上幾刀了結咗佢之後退過嚟，我求其攞地上碎塊玻璃不斷掟最後一隻屍犬阻擋佢。幾經辛苦𡃁妹都爬到入嚟。