一個香港留學生在美國的生活: 多倫多（3）

婚禮第二日阿傑同Joanne就去咗西班牙渡蜜月，四老加埋黃Uncle兩夫婦一齊開車去咗美加邊境睇瀑布，要禮拜二先返，到佢哋返到到多倫多嘅時候我都已經走咗。 

 

禮拜日中午約咗一班中學舊同學聚會，響多倫多我哋中學舊生會有成幾百人，過去十幾年有好多人移民又或者過嚟升學，我自己同屆同學都有成八個，仲有幾個老師都移咗民嚟多倫多。中午我哋幾個舊同學去咗Richmond Hill一間港式茶餐廳食Lunch，我哋幾個雖然同屆，不只有兩個係同過班，其他幾個都叫做識，不過唔熟，不過人離鄉賤，到咗外國，以前唔多玩埋嘅朋友都會一齊Hang Out，尤其是以前中學同學校友，人與人之間就多咗向心力。Lunch之後我哋幾個又去咗住響附近嘅一位退休老師屋企，我哋所人都畀佢教過，仲要唔止教過一年，佢就係教我哋音樂堂嘅音樂老師，難得嘅係佢仲記得哂我哋咁多個人名，一個下午就響歡笑同回憶中渡過。 

 

差唔多到五點大家各自歸家，其中一個同過班 I嘅同學Derek就問我之後有乜嘢做，「我今晚Free呀，聽日就應該有約，後日早機返三藩市。」「有冇興趣今晚一齊食飯？」「都好喎，有冇好介紹？」「French啱唔啱？加拿大French Cuisine唔錯㗎！」「啱！」我同Derek開車去咗Downtown一間響多倫多Rank#1嘅French Restaurant，入到去好似去咗歐洲嘅感覺，連Waiter都係講法文，坐低後睇餐牌，又係全部法文，不過估下估下都知大概係乜，令我感到意外嘅係Derek竟然可以用法文同Waiter溝通點菜，「估唔到你啲French咁勁！」「我響Montreal 讀大學，住足四年，多多少少都學到啲嘅！」「我哋好似中三同班，之後你去咗D班我去咗A班。」「係呀，我哋應該係第一次約埋一齊食飯！」「你大學Major邊科？」「Archit，你呢？」「Business Finance，不過依家做real estate development。」「咦，我同你算同行喎，我做Architect 同好多Developer合作，你做邊間公司？」「我情況比較複雜，算係自己生意啦！」於是我將我同Joe合作開公司投資房地產再申請綠卡嘅情況同Derek講，「我比你好彩，我屋企有加籍，不過我都想申請TN Visa去美國搵工，話晒美國機會比加拿大多好多。」「我返去三藩市忙你留意下。」 



 

同Derek食到一半電話響起，「Hello？」「阿偉？阿詩呀！食咗飯未呀？」「同朋友食緊。」「哦，我打嚟同你約實聽日schedule，你幾點得閑？」「我全日都Free。」「咁不如約十一點飲茶？都係去返Richmond Hill食。」「好呀，你畀個地址我，聽日見。」收線之後，Derek問我「約咗女朋友？」「Family Friend，結咗婚仲有個歲半嘅小朋友。」「你朋友講嗰間酒樓我識得人，要唔要幫手訂位？」「都好喎，咁唔該晒！」食法國菜係要好有耐性，呢餐飯我同Derek食足四粒鐘，一共十八道菜，埋單嘅時候Derek堅持要請，「唔好咁客氣啦，大家同學食飯AA咪算囉！」「響多倫多我係地主，更係我請你啦，到我去三藩市先到你請。」「咁我唔同你客氣！」今晚之後我同Derek變得比較熟，後來Derek真係搬咗去Bay Area，成為生意拍檔。