一個香港留學生在美國的生活: 多倫多（2）

第二日一早我就開車去搵阿𠎀，由多倫多開車沿著401公路向東行，由於係禮拜日車唔算多，大約兩個小時就到。阿𠎀住嘅係一間兩層高獨立屋，連埋地牢大約三千尺左右，有四間房，地方唔算大，不過已經足夠佢一家三口住，我去到撳鐘開門係Joanne嘅媽咪，「你一定係阿偉，快啲入嚟！」Joanne父母本身都係香港移民，早兩年搬咗嚟多倫多，住響Richmond Hill，呢幾日就係住響佢哋屋企幫手，我同Joanne佢哋打完招呼之後就同阿傑出去食早餐，咁耐冇見兩兄當好多嘢傾，佢同Joanne兩個響同一間大學同時報讀咗PhD，又有份教職，生活安定。 

 

「你有冇見到小詩一家呀？」「尋晚先同佢地食飯。」「我響大學嘅時候小詩同Ben幫咗我好同Joanne多，如果唔係我都冇咁快畢到業仲搵到工。」「係喎，Ben好似都響大學教書。」「係呀，教Architect，咁你有冇見到佢個女？好可愛呀！」「Michelle吖嘛！有呀，尋晚仲有同佢玩，都幾跟人，唔怕生。」「係呀，佢第二個預產期好似係Christmas。」「吓？第二個？尋晚冇聽佢提起喎！」「成五個幾月你睇唔到咩？」「咁真係冇留意喎！我哋成晚都係講你婚禮嘅嘢，冇講佢會生第二個。」「過幾日Wedding嘅時候你留意下啦！」 

 

今次再見阿傑，感覺上成熟咗好多，食完早餐返屋企，阿爸阿媽都到咗，雖然仲有一個禮拜就係婚禮，不過仲有好多嘢要準備。婚禮響大學附近一個Golf Course，阿𠎀同Joanne朋友唔多，再加上香港疫情冇親戚朋友香港過嚟，結果成個Party請唔夠四十人，不過阿傑本身都唔係太鐘意熱鬧，人少少仲唔洗咁煩。 



 

婚禮響禮拜六早上響Golf Club外邊大草坪上進行，阿傑同Joanne都係Christian，主禮人就係佢哋教會牧師，而我就當然係伴郎，整個婚禮過程差不多一個小時，之後就響Golf Club間餐廳食Lunch，六個人一枱，主家席自然係雙方父母同新郎新娘，而我就坐響黃Uncle嗰枱，連埋BB女Michelle啱啱六個人。我好自然咁又係坐響小詩隔離，今晚我終於留意到佢個肚，真係有咗第二個，不過就唔太明顯。 

 

「阿𠎀都結婚啦喎，幾時到你呀？」婚宴差不多結束，小詩突然問我呢個已經好多人問過嘅問題，「你唔覺得阿傑太早結婚咩？」「我都結咗婚啦，生埋女添，第二個都嚟緊啦！」「係喎，仲未恭喜你！」「唔好叉開話題，你拍拖未呀？」「冇呀，一個人咪幾好！」「好心你快啲Settle Down啦，Auntie成日問我有冇女仔介紹你識！」「事業為重，事業為重！哈哈！」「同你講嘢冇句正經！你幾時走啊？」「我會留多幾日，下禮拜二先返三藩市。」「我同Ben今晚返Markham住，禮拜日中午Ben會返去大學先，我同Michelle會留響多倫多一個禮拜，你仲有冇時間食飯？」「你約我實得啦！靚女約點可以Say No呀！唔係，係靚媽先啱」「口花花！咁禮拜一見啦！」