一個香港留學生在美國的生活: 多倫多（1）

八月二號禮拜六夜晚，我一個人坐UAL直航抵達多倫多國際機場。記憶中，我上次到訪多倫多應該係十幾年前嘅事，嗰次係一家人Road Trip由多倫多開車去Quebec，年紀太細唔係好記得玩過啲乜，所以今次再次嚟到多倫多感覺上好陌生。過咗海關攞埋行李就去租車，阿爸阿媽忙住幫阿傑籌備婚禮，又要招呼親家，所以就冇人接我機。 

 

由於三藩市同多倫多有三個鐘時差，到步嘅時候已經係黃昏，不過開車離開機場天仲未黑。阿傑同Joanne住響大學附近一個小鎭，距離多倫多市中心差唔多兩個鐘車，所以我冇打算今晚就入去搵佢，好彩Joe屋企響多倫多都有物業，我今就住響Downtown近湖邊一個High Rise Condo，雖然只係一房一廳八百尺細單，不過就有無敵湖景，單位係大廈頂樓，大廳同睡房都有落地玻璃可以睇哂成個Lake Ontario。由機場去都係十五分左右，Joe一早已經安排咗個Property Manager響大堂等我，攞咗鎖匙上樓，一入到屋就收到阿爸電話「係咪啱啱落機？」「爸，我到咗成個鐘啦，租咗車，啱啱到咗阿Joe間屋。」「你要唔要過埋嚟同我哋一齊呀？我同媽咪住響黃Uncle屋企。」「唔好啦，黃Uncle間屋咁遠，我住呢度響正Downtown，交通方便風景又正，不如你同媽咪搵日過嚟睇下？」「過咗Wedding先啦，呢幾日要忙你細佬嘅嘢，你今晚都冇約㗎啦，過嚟一齊食飯啦！七點半同黃Uncle一家，我畀個餐廳地址你！」 

 

自從兩年前小詩同佢老公阿Ben結咗婚之後就搬咗去多倫多住，冇耐仲生咗個女，於是黃Uncle兩公婆就搬埋去方便照顧。Ben同我細佬阿傑一樣，都係書蟲，響大學入面一邊讀PhD邊教書，小詩就留響屋企湊女做少奶奶。Ben讀書間大學其實都好遠下，響多倫多東面，平時小詩同Ben就住響大學宿舍區一楝獨立小屋，Weekend就會返去多倫多住，黃Uncle響Markham買咗間萬尺豪宅，雖然比唔上Vancouver間屋咁豪華，不過就大間好多，我阿爸媽今次嚟多倫多就係住響度。 



 

夜晚食飯係一間響多倫多非常之有名嘅粤菜館，聽講話係好多移咗民嚟多倫多香港名人嘅飯堂。佢哋哋Book咗七點半房，當我去到餐館嘅時候已經八點，阿爸阿媽同黃Uncle早就到左，仲有小詩一家人，「唔好意思遲到！」「你一落機趕嚟，已經好快啦！唔好講咁多，坐低先！時間啱啱好，應該差唔多上菜，你坐阿詩隔離啦！」黃Uncle好熱情招呼我坐低，我同阿爸阿媽阿Ben黃Auntie幾個打完招呼，跟著就響小詩傍邊坐低，而響小詩同Ben中間有張BB櫈，當然就係佢哋個女啦，我同小詩講「Hello，好耐冇見，呢個一定係Michelle！幾歲呀？」「就快嵗半啦，啱啱開始會叫人，Michelle，識唔識叫Uncle呀？」Michelle睜大對眼好奇咁望住我，同佢玩咗陣，waiter就開始上菜。 

 

成晚我同小詩傾謁唔多，感覺上好似陌生咗，大部分時間佢都係照顧Michelle，到咗十點左右，Ben同小詩同我阿爸阿媽一齊返去Markham間大宅，而我就一個人返去Joe間Condo。